ईरान आ इजरायलक बीच लगातार बढ़ैत तनावक बीच अमेरिका केर खुला चेतौनी पश्चिम एशियाक स्थितिकेँ आओर नाजुक कय देलक अछि। एही पूरा घटना पर पहिल बेर ईरान केर सर्वोच्च नेता आयातल्लाह अली खामेनेई एकटा कठोर आ सीधा संदेश देलनि। ओ साफ तौर पर कहलनि कि ईरान कखनो आत्मसमर्पण नहिं करत आ जँ अमेरिका सैन्य हस्तक्षेप करत तँ ओकरा एकर भारी कीमत चुकाबै पड़त।
86 वर्षीय खामेनेई बुधदिन राष्ट्रकेँ देल गेल संदेशमे कहलनि, ईरानी जनता हर हमलाक सामना करबा लेल पूरा तरहसँ तैयार अछि। इजरायली हमलाक बाद देशवासीकेँ धैर्य आ साहसक प्रशंसा करैत ओ कहलनि, राष्ट्र कोनो थोपल गेल युद्ध वा शांति समझौताक सामने नहि झुकत।
खामेनेई अमेरिकी राष्ट्रपति डोनाल्ड ट्रंप केर बयानकेँ सीधा जवाब देलनि, जाहिमे ट्रंप ईरानसँ ‘बिना शर्त आत्मसमर्पण’ करय केर मांग कयलनि। ट्रंप ई सेहो कहने छलथि कि अमेरिकाकेँ पता अछि जे खामेनेई कतय अछि, लेकिन ओकरा मारय केर इरादा नहि अछि। एही पर प्रतिक्रिया दैत खामेनेई कहलनि, जे ईरानक इतिहास जानैत अछि से धमकीक भाषा नहि बाजैत अछि।
इजरायल पर सेहो तीव्र हमला करैत खामेनेई कहलनि, ईरानी हवाई क्षेत्रमे घुसपैठ कय ओकरासँ बहुत पैघ गलती भऽ गेल अछि। ओ एकरा ईरान केर ‘लाल रेखा’ बतैलनि आ चेतावनी देलनि कि जे भी एकरा पार करत ओकरा नहि बख्शल जायत। खामेनी कहलनि, इजरायलकेँ अपन एही गलतिक भारी कीमत चुकाबै पड़त।
खामेनेई अपन संदेशमे ईरानी जनतासँ एकजुट रहबाक अपील कयलथि। ओ आश्वासन देलनि जे शहीदक खून व्यर्थ नहि जायत। खामेनेई कहलनि कि ईरान केर सैन्य ताकत ओकरा आत्मनिर्भर आ आत्मविश्वासी बनाबैत अछि आ देश हर परिस्थितिसँ निपटयमे सक्षम अछि।
एम्हर अमेरिकी सूत्रक हवालासँ खबरि आबि रहल अछि जे राष्ट्रपति ट्रंप आओर हुनकर सैन्य सलाहकार कतेको विकल्प पर विचार कय रहल छथि। एहिमे इजरायलक सहयोगसँ ईरानी परमाणु स्थल पर हमला करयकेँ योजना सेहो शामिल अछि। मुदा एखनि धरि एहि पर कोनो आधिकारिक फैसला नहि भेल अछि।
संयुक्त राष्ट्रमे ईरान केर राजदूत अली बहरीनी सेहो चेतौनी देलनि कि जँ अमेरिका सीधा कोनो हमलामे भाग लैत अछि तँ ईरान पूरा ताकतसँ जवाबी कार्यवाही करत। ओ ईहो कहलनि कि अमेरिका इजरायली हमलामे अप्रत्यक्ष भागीदार बनि चुकल अछि।
ईरान, इजरायल आ अमेरिकाक बीच जारी ई विवाद पश्चिम एशिया केर स्थितिकेँ बेसी तनावपूर्ण कय देलक अछि। विशेषज्ञक मानब अछि कि जँ कोनो पार्टी संयम नहिं रखैत अछि तँ ई द्वंद्व आबय वला दिनमे एकटा पैघ युद्धक रूप लऽ सकैत अछि। क्षेत्रीय शांति लेल ई स्थिति बहुत खतरनाक मानल जा रहल अछि।
