बड़बोला विधायक हरिभूषण ठाकुर बचौलक मिथिला राज्य पर देल गेल विवादित बयानक महापंचायतमे सबहक द्वारा भेल घोर निंदा
*
बिस्फी (मधुबनी) समदिया
*
काल्हि 16 जून, सोमकेँ विश्व प्रसिद्ध महाकवि विद्यापति डीह बिस्फी केर प्रांगणमे ‘मिथिला अस्मिता बचाओ महापंचायत दो’ बिस्फीक पूर्व उप प्रमुख भोला यादवक अध्यक्षतामे कयल गेल।
महापंचायतमे बिस्फी केर बड़बोला विधायक हरिभूषण ठाकुरक मिथिलाराज्य मांग करयवाला लोकक एवं मिथिला मैथिली करयवाला संस्था सभपर मुस्लिम राज स्थापित करय केर आरोप लगाबय केर विरोधमे देल गेल अमर्यादित एवं निन्दनीय बयानक उपस्थित वक्तासभ द्वारा घोर निंदा कयल गेल।
मिथिला मैथिली केर अग्रणी संस्था मैथिल समाज रहिका केर महासचिव प्रो. शीतलांबर झा महापंचायतमे उपस्थित लोक सभकेँ संबोधित करैत कहलनि कि बिस्फी विधायक हरिभूषण ठाकुर आठ करोड़ मिथिलावासीकेँ अपन बयानसँ अपमान कयलनि अछि। ओ कहलनि, मिथिला तऽ आदिकालमे देश छल जकर राजा जनक छलथि आ वैऽह हर जोतलनि तऽ आदिशक्ति माता जगज्जननी सीता जी केर प्राकट्य भेल छल , मिथिला केर भगिना बुद्धि ज्ञानक देवता गणेश , कार्तिक , लव कुश , एवं हनुमानजीक संग-संग राजा सलहेस , वीर लोरिक , दीनाभद्री , अयाची , मंडन , कालिदास , ज्योतिश्वर ठाकर , बाबा विद्यापति आदि विभूतिकेँ सेहो अपमानित कयल गेल अछि।
प्रो झा आगू कहलनि मिथिलावासी, मधुबनीवासी एवं बिस्फीवासीक कर्तव्य बनैत अछि कि बुद्धिहीन, मूर्ख विधायककेँ पूछय केर चाही कि मिथिलाकेँ अपमान करय केर अधिकार अहाँकेँ के देलक।
कार्यक्रमकेँ संबोधित करैत मिथिला स्टूडेंट्स यूनियन केर प्रदेश महासचिव प्रियरंजन पाण्डेय विधायकक निंदा करैत कहलनि कि जाधरि विधायक द्वारा मिथिलावासीसँ अपन निन्दनीय बयानक लिए माफी नहि माँगल जाएत ताधरि हमसभ बिस्फी सहित जिलामे महापंचायतक आयोजन कय हरिभूषण ठाकुर बचौलक पोल खोलैत रहब। ओ कहलनि हुनका मिथिलाक इतिहासक कोनो ज्ञान नहिं अछि, हुनका अविलंब माफी मांगय केर चाही।
कार्यक्रमकेँ मिथिलांचल सर्वांगीण संस्थानक अध्यक्ष अमर नाथ झा भोलन , विद्यापति स्मारक समितिक अध्यक्ष चंदेश , बिस्फी केर उप प्रमुख मो इशरायल ,बुद्धिजीवी विशुनदेव यादव , मुखिया बशिष्ठ नारायण झा, मिथिला मैथिली अभियानी जटाधार पासवान , जसवंत झा, मिथिला अभियानी मनोज झा , पूर्व मुखिया ललन कुमार झा , हंस कुमार ठाकुर , विश्वनाथ यादव , निर्भय कांत चौधरी , रौशन , अंकित आजाद , सुनील सहनी, रुदल यादव , बिमल यादव ,अशोक यादव , छात्र नेता राघवेन्द्र रमन , अरुण यादव , सहित दर्जन भरि लोकसँ अधिक संबोधित कयलनि।
मिथिलाक प्रसिध्द गायक राजनीति रंजन मिश्रक आधा दर्जन कलाकार सभ गायन प्रस्तुत कयलनि।
कार्यक्रमक संचालन छात्र नेता विजय श्री टुन्ना कयलनि। एहि महापंचायतमे बिस्फी केर सैकड़ो लोक सभ भाग लेलक।
