बिहारमे लालू यादवक एकटा वीडियो बिहारक राजनीतिमे हलचल मचा देलक अछि। जनसुरजक सूत्रधार प्रशांत किशोर सेहो एहि विवादमे कूदि पड़लाह। ओ कांग्रेस नेता राहुल गांधीकेँ सीधा चुनौती देलनि। बाबा साहेब अम्बेडकरक फोटोक लालू प्रसाद यादव द्वारा अपमानकेँ लऽ कऽ कांग्रेस पर आलोचना कयलनि। ओ राहुल गांधीसँ कहलनि जे, “अहाँमे हिम्मत अछि तँ बाबा साहेबक अपमान करय लेल लालू प्रसाद यादवक विरोध करू।”
प्रशांत किशोर अपन ‘बिहार बदलाव यात्रा’ केर तहत लगातार बिहारक विभिन्न जिला आ प्रखंडक दौरा पर जा रहल छथि। एही क्रममे ओ शनिदिन मुजफ्फरपुर पहुंचलाह, जतय ओ स्थानीय लोकसँ बातचीत कयलथि आ एकटा प्रेस कॉन्फ्रेंसकेँ सेहो संबोधित कयलथि। प्रेस कांफ्रेंसमे प्रशांत किशोर कांग्रेस आओर ओकर नेता राहुल गांधी पर कड़ा हमला केलनि। ओ कहलनि, बिहारमे कांग्रेसक कोनो राजनीतिक दर्जा नहि बचल अछि। पिछला 30 सालसँ कांग्रेस लालू यादव आ आब तेजस्वी यादवक झंडा लऽ कऽ चलि रहल अछि। प्रशांत किशोर राहुल गांधीकेँ चुनौती दैत कहलनि, जँ हुनकामे हिम्मत अछि तँ हुनका बिहारमे असगर चुनाव लड़बाक चाही। संगहि ओ कहलनि जे कांग्रेस आब अपन अस्तित्व लेल लड़ि रहल अछि आ आब बिहारमे ओकर कोनो स्वतंत्र पहचान नहि अछि।
प्रशांत किशोर लालू यादव पर आरोप लगौलनि जे लालू यादव अम्बेडकरक तस्वीरक सामने पैर राखि अपमानित कयने छथि। ओ कहलनि, “राहुल गांधी सब ठाम कहैत छथि ‘डरब नहि’, मुदा हम हुनका कहैत छी जे लालू यादवसँ नहि डेराउ, जँ हिम्मत अछि तँ’ लालू यादव द्वारा कयल गेल एहि अपमानक विरोध करू, बाबा साहेबक अपमान करयवला संग ठाढ़ नेता लोकनि दलित आ कमजोर तबकाक गप्प कोना कय सकैत छथि ?”
प्रशांत किशोर कहलनि जे आब बिहारक जनता नेताक वास्तविकताकेँ चिन्हब शुरू कय देलक अछि। ओ इहो कहलनि जे कांग्रेस सन पार्टीक आब बिहारमे जनसमर्थन खत्म भऽ गेल अछि आओर जँ राहुल गांधी सचमुच दलित आओर संविधानक रक्षाक बात करैत छथि तँ हुनका एहि मामिला पर अपन चुप्पी तोड़बाक चाही। ओ इहो कहलनि जे आब बिहारकेँ एकटा नव नेतृत्वक जरूरत अछि जे जाति आओर भतीजावादसँ ऊपर काज करय।
