प्रधानमंत्री नरेंद्र मोदी ऑपरेशन सिंदूरक बाद काल्हि यानी 15 जून 2025 केँ अपन पहिल विदेशी दौरा लेल रवाना भेलाह। अपन यात्राक दौरान पीएम मोदी कनाडाक दौरा सेहो करताह, जतय ओ जी-7 शिखर सम्मेलनमे भाग लेताह। काल्हि पांच दिनक विदेश यात्रा पर मोदी साइप्रस पहुँचलथि, जतय हुनका साइप्रस केर राष्ट्रपति स्वागत कयलनि।
तीन देशक दौरा पर जायसँ पहिने पीएम मोदी एकटा संदेश जारी कयलनि। ओ एक्स पर एकटा पोस्ट शेयर कयलनि आ अपन मैसेजमे लिखलनि, “आई हम तीन देशक यात्रा पर साइप्रस गणराज्य, कनाडा आ क्रोएशियाक यात्रा पर निकलि रहल छी। 15-16 जूनकेँ हम राष्ट्रपति महामहिम निकोस क्रिस्टोडौलिड्स केर आमंत्रण पर साइप्रस गणराज्यक दौरा करब। साइप्रस भूमध्यसागरीय क्षेत्र आ यूरोपीय संघक करीबी दोस्त आ महत्वपूर्ण भागीदार अछि। ई यात्रा ऐतिहासिक बंधनकेँ मजबूत करय आ व्यापार, निवेश, सुरक्षा आ तकनीकि क्षेत्रमे हमर संबंधकेँ विस्तार देत आ लोकसँ लोकक आदान-प्रदाकेँ बढ़ावा देबय केर अवसर प्रदान करत।”
ओ आगू लिखने छथि,”साइप्रससँ हम प्रधानमंत्री महामहिम मार्क कार्नी केर आमंत्रण पर जी-7 शिखर सम्मेलनमे भाग लेबय लेल कनाडाक कनानास्की जायब। एहि शिखर सम्मेलनसँ वैश्विक दक्षिण केर वैश्विक मुद्दा आ प्राथमिकता पर विचारक आदान-प्रदान करय केर जगह भेटत। हम भागीदार देशक नेता सबसँ सेहो बातचीत करय लेल बेसी उत्सुक छी।”
पीएम आगू लिखैय छथि,”हम 18 जूनकेँ क्रोएशिया गणराज्य केर यात्रा आ राष्ट्रपति ज़ोरन मिलानोविच आ प्रधानमंत्री आंद्रेय प्लेनकोविचसँ मुलाकातक इंतजार कय रहल छी। हमर दुनू देशक बीच सदियो पुरान घनिष्ठ सांस्कृतिक संबंध अछि। भारतीय प्रधानमंत्री केर क्रोएशिया केर पहिल यात्राक रूपमे ई आपसी हितक क्षेत्रमे द्विपक्षीय सहयोग लेल नव रास्ता खोलतै।”
संगहि ओ लिखलन्हि,”ई तीन राष्ट्रक यात्रा सीमा पारसँ आतंकवादक खिलाफ हमर लड़ाईमे भारतक अडिग सहयोग लेल सहयोगी देशकेँ धन्यवाद देबाक आ आतंकवाद केर हर रूप आ प्रकटीकरणक मुकाबला करय लेल वैश्विक समझदारीकेँ प्रेरित करय केर मौका सेहो अछि।”
