महाराष्ट्रक पुणेमे काल्हि एकटा पैघ दुर्घटना भऽ गेल। जनतबक अनुसार पिंपरी-चिंचवड थाना अंतर्गत कुंडमाला गामक समीप इन्द्रायणी नदी पर बनल पुल खसि पड़ल अछि। एहि दुर्घटनामे बहुत लोकक फंसय केर आशंका अछि, जखन कि एहि दुर्घटनामे प्राप्त समाचार धरि दू गोटेके मृत्यु भऽ गेल अछि। घटनाक जनतब दैत पिंपरी-चिंचवड पुलिस कहलक जे, दुर्घटनामे पांचसँ छह लोककेँ बचाओल गेल अछि आ दू गोटेक मृत्यु भऽ गेल अछि।
एम्हर बचाव अभियान केर नेतृत्व करय वला एकटा सदस्य कहलनि जे, ‘बचाव अभियान जारी अछि। किछु लोककेँ बचाओल गेल अछि। हमरा सबकेँ पक्का पता नै अछि, मुदा संभवतः 20-25 लोक ढहल पुलक मलबाक नीचा फंसल छथि। पुलिस अधिकारी कहलनि जे, राष्ट्रीय आपदा प्रतिक्रिया बलक टीम आ दमकल विभाग सहित अन्य विशेष इकाईक कर्मी मौका पर अछि। पुलिस अधिकारी कहलनि जे, एहि इलाकामे पिकनिक करय वला केर भारी भीड़ अछि।
एहि मामिलामे तालेगांव दभाड़े थानाक एकटा अधिकारी कहलनि जे, ‘शुरुआती जनतबक अनुसार इंद्रायणी नदी पर लोहाक पुल खसलाक बाद एक व्यक्तिकेँ जलमे बहि जेबाक आशंका अछि।’ बता दी जे इन्द्रायणी नदी पर बनल पुलक दू भाग अछि, एकटा सीमेंटक हिस्सा आ दोसर लोहा केर हिस्सा छल, जे ढहि गेल अछि। पिछला किछु दिनसँ इलाकामे भारी बरखा भऽ रहल अछि।
पुलिसक अनुसार रविदिन दुपहरियामे नदी पर बनल लोहाक पुल खसि पड़ल। ई घटना मावल तहसील केर कुंडमाला इलाका लग घटित भेल अछि, जकर बाद एनडीआरएफ केर टीम मौका पर बचाव अभियान चला रहल अछि।
