धुबरीक प्रसिद्ध हनुमान मंदिरमे गायक सिर भेटबाक मामिला तेजीसँ बढ़ि रहल अछि। मुख्यमंत्री हिमंत विश्व सरमा एहि संबंधमे शूट एट साइट’क ऑर्डर देलनि अछि। मुख्यमंत्री एक्स पर एकटा पोस्टमे कहलनि जे ‘धुबरीमे एकटा विशेष वर्ग हमर मंदिरकेँ नुकसान पहुंचेबाक मंशासँ सक्रिय भऽ गेल अछि। हम देखैत गोली मारबाक आदेश देने छी’।
जनतब जे 8 जूनकेँ रविदिन भोरे मंदिरक बाहर गायक सिर भेटलाक बाद स्थानीय स्तर पर बहुत हंगामा भेल। स्थानीय लोक मुख्य सड़क बंद कए टायर जरा कए अपराधीक खिलाफ कार्यवाहीक मांग कयलक। मामिलाकेँ हाथसँ निकलैत देखि धुबरीक उपायुक्त आ पुलिस अधीक्षक लोककेँ समझा कय उचित कार्यवाहीक आश्वासन देलनि। आब मुख्यमंत्री स्वयं शूट एट साइट’क ऑर्डर देने छथि।
शूट एट साइट ऑर्डर एहेन स्थितिमे देल जाइत अछि जखनि स्थिति खराब भऽ रहल अछि आ इ अंतिम विकल्प रहैत अछि । भारतक कानूनक अनुसार राज्य सरकार लग एकरा जारी करय केर अधिकार अछि। आमतौर पर हिंसा वा संवेदनशील स्थितिकें ध्यानमे राखैत इ जारी कयल जाइत अछि। बहुत मामिलामे मौका पर मौजूद मजिस्ट्रेट वा पुलिस अधिकारी भीड़केँ गैरकानूनी घोषित कय सकैत अछि आ इ आदेश जारी कय सकैत अछि, जाहिमे पुलिस अपन सुरक्षा लेल उचित कदम उठा सकैत अछि।
आरोप लगाओल जा रहल अछि जे धार्मिक हिंसाकेँ भड़काबय लेल वार्ड नंबर 3 केर प्रसिद्ध हनुमान मंदिरकेँ बाहर गाय केर सिर राखल गेल छल। घटनाक बाद इलाकामे काफी तनाव अछि। तनाव देखैत कर्फ्यू लगा देल गेल अछि।
