गुजरातक अहमदाबादमे काल्हि बृहस्पतिकेँ दिनमे एकटा पैघ विमान दुर्घटना भेल। एयर इंडिया केर एआई-171 विमान अहमदाबादक मेघनी नगरमे दुर्घटनाग्रस्त भऽ गेल। एहि दुर्घटनाक जनतब दैत अहमदाबाद पुलिस आयुक्त कहलनि जे 204 लोकक मृत्युक पुष्टि भऽ गेल अछि आ 41 गोटे घायल छथि, जिनकर इलाज सिविल अस्पतालमे चलि रहल अछि।
अहमदाबादसँ लंदन केर गैटविक जा रहल एयर इंडिया केर बोइंग 787 ड्रीमलाइनर विमान एआई-171 उड़ान भरलाक किछु देर बाद दुर्घटनाग्रस्त भऽ गेलै। एहि फ्लाइटमे कुल 242 लोक छल, जाहिमे 230 यात्री आ 12 चालक दलक सदस्य शामिल छल। एहि विमानमे गुजरातक पूर्व सीएम विजय रूपानी सेहो सवार छलाह। रडार केर आंकड़ाक अनुसार ई विमान सरदार वल्लभाई पटेल अंतर्राष्ट्रीय हवाई अड्डासँ दुपहर 1:39 बजे उड़ान भरलक, मुदा समुद्र तलसँ ६२५ फीटक ऊंचाई पर पहुँचलाक बाद तकनीकी गड़बड़ी भेल आ हवाई यातायात नियंत्रणसँ संपर्क टूटी गेल।
विमानमे 53 ब्रिटिश नागरिक, 7 पुर्तगाली आ एकटा कनाडाई यात्री संग 169 भारतीय नागरिक छल। नागरिक उड्डयन मंत्रालय अहमदाबाद हवाई अड्डा पर उड़ान परिचालन फेरसँ शुरू भऽ गेल अछि। दुर्घटनाक बाद उड़ान परिचालन बंद भऽ गेल छल।
राष्ट्रपति द्रौपदी मुर्मू एहि दुर्घटना पर गहींर शोक व्यक्त केलनि। ओ कहलनि, अहमदाबादमे विमान दुर्घटनाक बारेमे जानि हमरा बहुत दुख भऽ रहल अछि। ई हृदयविदारक विपत्ति अछि। प्रभावित लोकक संग हमर संवेदना आ प्रार्थना अछि। अवर्णनीय शोकक एहि घड़ीमे पूरा देश हुनका संग ठाढ़ अछि।
प्रधानमंत्री नरेन्द्र मोदी दुर्घटना पर गहींर शोक व्यक्त कयलनि। ओ कहलनि, अहमदाबादक त्रासदी हमरा सबके चौंका देलक आ दुखी कय देलक अछि। कहय लेल शब्द नहिं, दिल दहलाबै वाला घटना अछि। एहि दुखद घड़ीमे एहिसँ प्रभावित सब लोकक संग हमर संवेदना अछि। मंत्री आ अधिकारी सबसँ लगातार संपर्कमे छी। जे प्रभावित लोकक मददकेँ लेल काज कय रहल छथि।
ब्रिटेनक प्रधानमंत्री केयर स्टारमर कहलनि कि अहमदाबादसँ आयल दृश्य ‘विनाशकारी’ अछि ।
स्थितिक संग हम अपडेट पर नजरि रखने छी आ प्रभावित परिवारक संग छी ।
जनतब जे, एहि विमान दुर्घटनामे गुजरातक पूर्व सीएम विजय रूपाणीक सेहो मृत्यु भऽ गेल छनि। दुर्घटनाक समय ओ एयर इंडियाक फ्लाइटमे मौजूद छलाह आ बेटीसँ भेंट करय लेल लंदन जा रहल छलाह।
दुर्घटनाग्रस्त भेल विमानकेँ कैप्टन सुमित सभरवाल उड़ाबैत छलाह, जखनि कि फर्स्ट ऑफिसर क्लाइव कुंदर हुनका संग छलाह। सुमित सभरवाल बहुत अनुभवी पायलट छलाह आ हुनका 8200 घंटाक उड़ान भरबाक अनुभव छलनि। एहि दुर्घटनाक बाद दिल्लीसँ अहमदाबादक लेल सभ फ्लाइट रद्द कय देल गेल।
समाचार सम्प्रेषण धरि मौका पर राहत आ बचाव कार्य लेल एनडीआरएफ आ अन्य एजेंसी मिलिकय काज कय रहल छल। एयर इंडिया हेल्पलाइन नंबर 18005691444 जारी कयने अछि।
