मुख्यमंत्री नीतीश कुमारक अध्यक्षतामे भेल केबिनेट बैसारमे विभिन्न विभागसँ जुड़ल कुल 22 प्रस्तावकेँ मंजूरी देल गेल। कैबिनेट बैसारक बाद कैबिनेट सचिवालय विभागक अपर मुख्य सचिव एस सिद्धार्थ पत्रकारकेँ बैसारक जनतब दैत कहलनि जे कैबिनेटक बैसारमे कतेको पैघ फैसला लेल गेल अछि।
महिला सरकारी सेवककेँ हुनकर पदस्थापन स्थानक समीप सेवानिवृत्ति सुविधा देबाक नीति निर्धारित करबाक प्रस्ताव केर सेहो मंजूरी भेटि गेल अछि। कैबिनेट सचिवालय विभागक अंतर्गत विमान संगठन निदेशालयमे विभिन्न श्रेणीक चारि रोजगार आधारित पदक निर्माण कयल गेल अछि। एकर संग पटना केर जयप्रकाश नारायण अस्पतालमे स्पोर्ट्स इंजरी यूनिट केर स्थापना आ संचालन लेल 36 नव पदक निर्माण कयल गेल अछि।
एकर अलावा कृषि विपणन निदेशालयमे विभिन्न श्रेणीक 14 पद बनाबय केर प्रस्तावकेँ सेहो बैसारमे मंजूरी देल गेल। ओ जनतब देलनि जे बैसारमे प्रधानमंत्री जनजाति आदिवासी न्याय महाअभियानक तहत राज्य केर अनुसूचित जनजाति श्रेणीक तहत चिन्हित नौ जनजातिक पात्र लाभार्थीकेँ केंद्र प्रायोजित प्रधानमंत्री आवास योजना-ग्रामीणक तहत आवास लाभ देबय केर मंजूरी सेहो देल गेल अछि। बैसारमे जन्म आ मृत्यु पंजीकरण अधिनियम, 1969 (18 केर 1969) केर धारा 30 द्वारा देल गेल अधिकारक प्रयोग करैत बिहार जन्म आ मृत्यु पंजीकरण नियम, 1999 मे संशोधन कय ‘बिहार जन्म आ मृत्यु पंजीकरण (संशोधन) नियम, 2025’ बनेबाक प्रस्तावकेँ सेहो मंजूरी देल गेल अछि।
