दरभंगा नगर थाना क्षेत्रक टावर चौक पर स्थित सेंट्रल बैंक ऑफ इंडिया शाखामे सोमदिन दिनदेखारे एकटा पैघ वारदात भेल। बैंक परिसरक अंदर जैन फार्माक कर्मचारी शिवम ठाकुरसँ तीनटा अज्ञात अपराधी 3 लाख 81 हजार रुपया लूटि लेलक। भागैत काल पीड़ित हिम्मत देखौलक आ एकटा लुटेराकेँ पकड़ि लेलक, जखनि कि बाकी दू टा लुटेरा पाइ भरल बैग लs कs भागि गेल।
घटनाक जानकारी भेटैत देरी नगर थाना मौका पर पहुंचल आ पकड़ायल लुटेरासँ पूछताछ शुरू कs देलक। पुलिस लगपासक सीसीटीवी फुटेजक तलाशीमे जुटल अछि।
लूटक समय बैंक गेट पर सुरक्षा गार्ड तैनात नहि छल। आ नहिं बैंक परिसरमे कोनो सायरन बाजल। मानल जा रहल अछि जे सुरक्षा व्यवस्थामे भेल एहि चूकक फायदा उठा कs लुटेरा सब आसानीसँ भागि गेल।
जानकारीक अनुसार दवाई कंपनी जैन फार्माक कर्मचारी शिवम ठाकुर रोजानाक तरह करीब 12 बजे सेंट्रल बैंकक टावर चौक शाखामे पैसा जमा करय आयल छलथि। ओ बैंकक भीतर कतारमे ठाढ़ भ’ क’ अपन बारीक प्रतीक्षामे छलाह, कि चारि टा युवक हुनका लग आबि गेल. एकटा युवक निकासी फॉर्म भरबाक जानकारी पूछैत काल हुनका गपमे संलग्न कs देलक। एम्हर एकटा आओर युवक हाथसँ पाइ भरल झोरा छीनि क’ भागि गेल। शिवमके जहिना बुझायल जे लूटि रहल अछि, ओ तुरंत बैंक परिसरमे युवकक पीछा करय लागल। थोड़ेक दूर दौड़ैत काल एकटा लुटेराकेँ पकड़ि लेलक, मुदा बाकी दूटा लुटेरा पाइ लऽ कऽ भागि गेल।
बैंक कर्मचारीक जानकारी पर नगर थानाक पुलिस मौका पर पहुंचि गिरफ्तार लुटेराकेँ अपन हिरासतमे लs लेलक। ओकरासँ पूछताछ भs रहल अछि। पुलिस सूत्रक अनुसार बैंकक सीसीटीवी फुटेजमे चारिटा युवक देखल जा रहल अछि, जाहिमे सँ तीन गोटे मिलिकय ई अपराध कयलक। फिलहाल पुलिस फरार लुटेरा सभक तलाशमे संभावित ठिकाना पर छापा मारि रहल अछि।
