तमिलनाडुक दौरा पर काल्हि केंद्रीय गृहमंत्री अमित शाह मदुरैमे उग्र भाषण देलनि। एहिमे ओ कहलनि जे भाजपा नेतृत्व वाला गठबंधन 2026 केर विधानसभा चुनावक बाद राज्यमे सरकार बनाओत।
राजनीतिक संदेशसँ भरल भाषणमे अमित शाह नहि केवल तमिलनाडुमे बल्कि पश्चिम बंगालमे सेहो भाजपाक आगमनक भविष्यवाणी कयलनि। शाह कहलनि, तमिलनाडुक जनता भ्रष्ट डीएमके शासनकेँ उखाड़यक इंतजारमे अछि, 2026 मे तमिलनाडु आ पश्चिम बंगालमे भाजपाक शासन तय अछि, हमर नजरि आ कान तमिलनाडु पर अछि।
गृहमंत्री ऑपरेशन सिन्दूरक जिक्र करैत एकरा प्रधानमंत्री नरेंद्र मोदीक नेतृत्वमे भारतक सैन्य दृढ़ताक दर्शाबयवला मोड़ बतेलनि। रक्षामे आत्मनिर्भरताक लेल मोदी सरकारक प्रयास पर जोर दैत शाह कहलनि जे, जखनि पाकिस्तान मिसाइल आ ड्रोन छोड़लक तँ हमर प्रतिक्रिया दुनिया देखलक। हमर सेना 100 किलोमीटर पाकिस्तानमे उड़ि कय सर्जिकल स्ट्राइक कयलक। अमित शाह दावा कयलनि कि एहि मिशनसँ तमिलनाडुमे ‘समर्थनक लहरि’ पैदा भऽ गेलै आ कहलनि कि एहिसँ युवाक बीच कावेरी इंजन जेना स्वदेशी रक्षा परियोजनाक बारेमे चर्चा सेहो बढ़ि गेल अछि।
सत्तारूढ़ डीएमके पर व्यापक भ्रष्टाचार आ प्रशासनिक असफलताक आरोप लगाबैत अमित शाह कहलनि जे, “ई सरकार चुनावी वादाक 10% तक पूरा नहि कयलक अछि। अवैध शराबक कारण मौतसँ लऽ कय टीएएसएमएसीमे 39 हजार करोड़ रुपयाक घोटाला धरि डीएमके शत-प्रतिशत असफल सरकार अछि।” ओ स्टालिनक नेतृत्व वला सरकार पर केंद्रीय धनक दुरुपयोग आ प्रमुख विकास योजनाकेँ लागू नहि करय केर आरोप लगेलनि । ओ आरोप लगौलनि जे मोदीक धन तमिलनाडुक जनता धरि नहि पहुंच रहल अछि, ओकरा डीएमके द्वारा मोड़ल जा रहल अछि। सत्तारूढ़ डीएमके केर मुख्यमंत्री एमके स्टालिनकेँ चुनौती दैत ओ कहलनि, जँ मुख्यमंत्री द्वारा चुनावी वादाक मात्र १०% काज पूरा कयल गेल होय तँ सूची साझा करय आ राज्यकेँ तमिलमे इंजीनियरिंग शिक्षा सहित उच्च शिक्षाक बढ़ावा देबाक अनिच्छा पर सवाल सेहो उठेलनि ।
