भारतक निर्वाचन आयोग नव तकनीकीक संग अनुमानित मतदान प्रतिशतकेँ आओर सटीक करय जा रहल अछि। आब हर दू घंटामे ECINET ऐपक माध्यमसँ मतदान डाटा अपडेट होयत, जाहिसँ देरी समाप्त होएत आ पारदर्शिता बढ़त।
भारत निर्वाचन आयोग (ECI) वोटर वोटिंग प्रतिशत (Voter Turnout) केँ आओर सटीक आ तेजीसँ साझा करबा लेल एकटख नव तकनीकी शुरू कय रहल अछि। एहि नव प्रणालीक तहत, मतदान केंद्र पर तैनात पीठासीन अधिकारी आब हर दू घंटेमे ECINET ऐप पर सीधे मतदान डाटा अपडेट करत। एहिसँ अनुमानित मतदान प्रतिशतक रुझान समय पर जनताक संग पहुँचत। ई कदम पारदर्शिता बढ़ेबा आ पुरान मैनुअल प्रक्रियासँ होइवला देरीकेँ समाप्त करबाक दिशामे बड़ बदलाव अछि। पहिने, मतदान डाटाकेँ सेक्टर अधिकारी मैन्युअल रूपसँ संग्रहित कऽ फोन कॉल, एसएमएस वा मैसेजिंग ऐपक माध्यमसँ रिटर्निंग ऑफिसर (RO) धरि पहुँचाबैत छलथि। एहि प्रक्रियामे 4-5 घंटा वा ताहिसँ बेसी समयक देरी होइत छल, जाहि कारणसँ कतेको बेर गलतफहमीक स्थिति उत्पन्न भऽ जाइत छल।
आब नव प्रणाली में ECINET ऐप केर माध्यमसँ डेटा त्वरित दर्ज होएत, जेकरा स्वचालित रूपसँ निर्वाचन क्षेत्र स्तर पर संग्रहित कएल जएत। जँ कोनो क्षेत्रमे मोबाइल नेटवर्क उपलब्ध नहि अछि, तऽ डेटा ऑफलाइन दर्ज कएल जएत आ नेटवर्क भेटला पर त्वरित सिन्क (Sync) कएल जएत।
चुनाव आयोगक ई कदम मुख्य चुनाव आयुक्त ज्ञानेश कुमारक ओहि प्रतिबद्धताक भाग मानल जाइत अछि, जाहिमे ओ समय पर आ पारदर्शी जानकारी देबय पर जोर देलथि अछि। ई नव प्रणाली बिहार विधानसभा चुनावसँ पहिने लागू भऽ जाएत, जाहिमे मतदाताक मतदानक रुझान हर दू घंटामे आसानीसँ उपलब्ध होएत। चुनावक संचालन नियम 1961 केर नियम 49 एस केर तहत, पीठासीन अधिकारीकेँ मतदानक अंतमे फॉर्म 17 सी केर माध्यमसँ मतदानक विवरण उम्मीदवारक प्रतिनिधिकेँ देब जरूरी अछि। ई कानूनी प्रक्रिया पहिलुके जेकाँ रहत, मुदा नव तकनीकि अनुमानित मतदान डेटाकेँ तेजीसँ जनता तक पहुँचाबयमे मददि करत। ई नव पहलसँ नहिं केवल समयक बचत होएत, बल्कि मतदाता सभ आ जनताक बीच विश्वास सेहो बढ़त।
चुनाव आयोगक ई कदम डिजिटल प्रविधिक उपयोगकेँ बढावा देबाक आ चुनाव प्रक्रियाकेँ आर पारदर्शी बनेबाक दिशामें एकटा पैघ कदम अछि। ECINET, एकटा बेहतरीन यूजर इंटरफेस (UI) आ यूजर फ्रेंडली अनुभव (UX) प्रस्तुत करत जकरा द्वारा सभ चुनावी-संबंधित गतिविधिक लेल एकटा एकल प्लेटफॉर्म उपलब्ध होयत। ई कदम उपयोगकर्ता सभकेँ कतेको ऐप डाउनलोड करबाक आ अलग-अलग लॉगिन याद रखबाक बोझकेँ कम करबाक लेल सेहो डिज़ाइन कएल गेल अछि।
ECINET मे वोटर हेल्पलाइन ऐप, वोटर टर्नआउट ऐप, cVIGIL, सुविधा 2.0, ESMS, सक्षम आ KYC ऐप जकाँ मौजूदा ऐप सभ शामिल होयत, जकरा कुल मिलाकय 5.5 करोड़सँ बेसी बेर डाउनलोड कएल गेल अछि। ECINET सँ लगभग 100 करोड़ मतदाता सभक पूरक चुनावी तंत्रकेँ लाभ भेटबाक आशा अछि, जाहिमे 10.5 लाखसँ बेसी बूथ लेबल अधिकारी (BLO), राजनीतिक दल द्वारा नियुक्त लगभग 15 लाख बूथ लेबल एजेंट (BLA), लगभग 45 लाख मतदान अधिकारी, 15,597 सहायक निर्वाचन पंजीकरण अधिकारी (AERO), 4,123 इलेक्टोरल रजिस्ट्रेशन ऑफिसर (ERO) आ देश भरिक 767 जिला चुनाव अधिकारी (DEO) शामिल अछि।
