कांग्रेस नेता राहुल गांधी फेरसँ पीएम मोदी पर हमला कयलनि अछि।राहुल गांधी पहलगाम आतंकी हमलाक बाद अमेरिकाक निर्देश पर ऑपरेशन सिंदूरकेँ रोकय केर आरोप लगेलनि।
राहुल गांधी कहलनि जे, अमेरिकी राष्ट्रपति डोनाल्ड ट्रंपक फोन कॉल पर पीएम मोदी आत्मसमर्पण कय देलनि। कांग्रेसक ताकतिक गप करैत राहुल कहलनि जे हमर पार्टी महाशक्तिक सोँझा प्रणाम नहि करैत अछि।
राहुल गांधी भोपालमे एकटा बैसारमे कहलनि जे ट्रंपक फोन आयल आ नरेंद्रजी तुरंत आत्मसमर्पण कय देलनि। राहुल कहलनि जे, इतिहास गवाह अछि, ई भाजपा आ राष्ट्रीय स्वयंसेवक संघक चरित्र अछि। सदिखन झुकि जाइत अछि। कांग्रेस नेता आगू कहलनि जे, अमेरिकाक खतराक बावजूद भारत 1971 मे पाकिस्तानकेँ तोड़ि देलक। ओ कहलनि जे कांग्रेसक शेर आ शेरनी महाशक्तिसँ लड़ैत अछि, ओ कहियो झुकैत नहि अछि।
ओ आगू कहलाह, जखने ट्रम्प ओम्हरसँ इशारा कयलनि, फोन पर कहलक – मोदी जी की कय रहल छी नरेन्द्र…आत्मसमर्पण करू, हाँ सर कहैत नरेन्द्र मोदी ट्रम्पक इशाराक पालन कयलनि। अहाँकेँ याद होयत, जखनि फोन नहि आयल छल तखनि 7म फ्लीट आबि गेल छल।
71 केर युद्धमे हथियार आबि गेल छल, विमानवाहक पोत आबि गेल छल। इंदिरा गांधी कहने छलीह जे हमरा जे करबाक अछि से करब। इ अंतर अछि।
राहुल गांधी अपन भाषणमे आरएसएसकेँ निशाना बनेलनि। कांग्रेस नेता कहलनि जे आब हमरा नीक जकाँ बुझल अछि, हुनका सभ पर कनेक दबाव बनाउ, कनेक धक्का दियौ ओ सभ डरसँ भागि जाइत अछि। आजादीक समयसँ आत्मसमर्पण पत्र लिखबाक आदति छनि। जँ एक सेकेंडमे कनि दबाव पड़ि जाय त ई ओकर चरित्र अछि।
ओ कहलनि जे, कांग्रेस आत्मसमर्पण नहि करैत अछि। महात्मा गांधी, जवाहरलाल नेहरू आ सरदार पटेलक उदाहरण दैत राहुल कहलनि जे, ई आत्मसमर्पण करय वाला नहि अछि।
