सीबीआई आयकर विभागक एकटा पूर्व अपर आयुक्तक 7 करोड़सँ बेसी केर संपत्ति जब्त कय लेलक अछि। आरोप अछि जे अधिकारी 2008 सँ 2018 केर बीच विभिन्न पद पर रहैत अवैध संपत्ति हासिल कयने छल। ई संपत्ति गाजियाबाद, लखनऊ, हरदोई, बाराबंकी आ गोवामे अछि। 2 जूनकेँ गाजियाबादक सीबीआई कोर्ट एहि मामिलामे 14टा संपत्तिकेँ अस्थायी तौर पर जब्त करबाक आदेश देने छल।
सीबीआई 22 सितंबर 2022 केँ ई मामिला दर्ज करौने छल, आरोप अछि जे संबंधित अधिकारी जखनि 1 जनवरी 2008 सँ 30 जून 2018 केर बीच दिल्ली, मुरादाबाद, लखनऊ आ अन्य ठाम उपायुक्त, संयुक्त आयुक्त आ अतिरिक्त आयुक्तक पद पर तैनात छलाह, तखनि भ्रष्ट तरीकासँ 7.5 करोड़ टकासँ बेसीक अवैध संपत्ति बनेलक
ई सम्पत्ति हुनकर आमदनीसँ बहुत बेसी छल । आयकर विभागक पूर्व अधिकारी एहि संबंधमे कोनो संतोषजनक जवाब नहि दऽ सकलाह। जांचक दौरान पता चलल जे आरोपी आ परिवारक नाम पर 14 टा अचल संपत्ति अछि, जकर कीमत करोड़ोमे अछि। फिलहाल एहि मामिला केर जांच चलि रहल अछि।
एकटा दोसर मामिलामे सेहो सीबीआई पैघ कार्यवाही कयलक अछि। आईआरएस अधिकारी अमित कुमार सिंघल’क नुकायल जगह केर तलाशीक दौरान एक करोड़ रुपया नगद आ 3.5 किलो सोना जब्त कयल गेल। 25 लाख रुपैयाक घूसक मामिलामे अधिकारीकेँ अपन सहयोगीक संग गिरफ्तार कयल गेल। सीबीआई केर प्राथमिकीक अनुसार ला पिनोज पिज्जा मालिक सनम कपूरकेँ जारी आयकर नोटिसक निपटाराक लेल ओ 45 लाख रुपयाक घूसक मांग कयने छलाह। अधिकारी कहलनि जे, पछिला शनिदिन पंजाबक मोहाली स्थित सिंघलक आवास पर 25 लाखक पहिल किस्त पहुंचा देल गेल। अधिकारी दिसिसँ हर्ष कोटक नामक व्यवसायी रूपया लेलक। कपूरक शिकायत पर कार्यवाही करैत सीबीआई परिसरमे छापा मारलक आ हर्षकेँ गिरफ्तार कयलक। एकर बाद केंद्रीय एजेंसी 2007 बैचक आईआरएस अधिकारीकेँ दिल्ली स्थित आवाससँ गिरफ्तार कयलक।
