काल्हि मुजफ्फरपुर जिलामे बलात्कार पीड़िताक मृत्युक मामिला पर हंगामा मचल। पीड़िताकेँ 4 घंटा धरि एम्बुलेंसमे इंतजार कराबय केर आरोप लागैत अछि। महिला आयोग सेहो एहि मामिला पर स्वत: संज्ञान लेलक अछि।
जिलामे एकटा नाबालिग दलित लड़कीसँ बलात्कार आ हत्या केर दर्दनाक घटना सामने आएल अछि। एहि मामिलामे प्रशासन पर सेहो लापरवाही केर आरोप लागि रहल अछि। वास्तवमे, महिला आयोग कहलक, बलात्कार पीड़िताकेँ बिना कोनो इलाजक सुविधा केर चारि घंटासँ बेसी समय धरि एम्बुलेंसमे इंतजार करय पड़ल। महिला आयोगक अध्यक्ष एहि घटनाकेँ घोर निंदा कयलनि।
ओतय, राजद नेता तेजस्वी यादव सेहो एहि घटना पर प्रतिक्रिया दैत सरकार आ कानून व्यवस्था पर आरोप लगेने छथि।
पुलिस जनतब देलक जे बलात्कार केर ई घटना बीतल 27 मईकेँ सामने आयल रहय। मुजफ्फरपुर जिलाक एसएसपी सुशील कुमार केर अनुसार, बलात्कार आ हत्याक आरोपी पड़ोसक गाममे रहैत अछि आ पीड़िताकेँ जानैत सेहो छल। ओ माछ विक्रेता छल आ अक्सर ओतय आबैत-जाइत छल। आरोपी नाबालिगकेँ बहला-फुसला कय ओकर संग बलात्कर कएलक।
राष्ट्रिय महिला आयोगक अध्यक्ष विजया राहटकर नाबालिग दलित बलात्कार पीड़िता केर दुखद मृत्यु पर स्वतः संज्ञान लेलनि। ओ एहि मामिलामे घोर लापरवाही आ व्यवस्थागत विफलतासभक कड़ा निंदा कय रहल छथि। महिला आयोगक अध्यक्ष बिहारक मुख्य सचिव आ डीजीपीकेँ एहि पूरा मामिलाक गहन आ निष्पक्ष जांच करबाक निर्देश देलनि। ओ एहि मामिलामे भेल चूकमे अस्पताल अधिकारीसभ आ पुलिसक भूमिका केर जांच करबाक मांग सेहो कयलनि। महिला आयोगक अध्यक्ष विजया राहटकर मांग कयलनि अछि जे अपन काजमे लापरवाही बरतबाक दोषी पाओल गेलाक बाद तात्कालिक कार्यवाही करबाक चाही। महिला आयोग एहि घटना पर तीन दिनक भीतर विस्तृत कार्यवाही रिपोर्ट मांगलक अछि।
मुजफ्फरपुरमे नाबालिग संग कथित बलात्कार आ हत्याक घटनासँ सम्बन्धित राजद नेता तेजस्वी यादव सरकार आ पुलिस पर पैघ हमला कएलनि अछि। तेजस्वी कहलनि अछि जे बिहारमे डबल इंजनक सरकार फेल भऽ गेल अछि। हमरा नहि बुझल अछि जे मुख्यमंत्रीकेँ घटनाक जनतब अछि वा नहि।
तेजस्वी आगू कहलनि, बिहारमें कानून-व्यवस्था ध्वस्त भऽ गेल अछि आ आपराधिक बोलबाला अछि। तेजस्वी कहलनि अछि जे संपूर्ण बिहारमे प्रशासनिक अराजकता अछि, मुदा कोनो कार्यवाही नहि भऽ रहल अछि। सीएम आ दुनू डिप्टी सीएम राजनीतिक कार्यक्रममे व्यस्त छथि आ पीड़ित परिवारसँ भेंट करबाक लेल ककरो लग समय नहि अछि।
