राजधानी पटनासँ एकटा सनसनीखेज मामिला सामने आएल अछि। मामिला पटनाक पचरुखिया थाना क्षेत्रक एकटा गामक अछि। एहि सभ बच्चीक उम्र 10 सँ 15 केर बीच अछि। पुलिसक कहब अछि जे किशोरी केर बरामदगी लेल प्रयास कएल जा रहल अछि।
पटना जिलाक ग्रामीण क्षेत्रसँ एक संग चारिटा लड़की लापता भऽ गेल अछि। बीतल शनिकेँ (31 मई, 2025) ई सभ घरसँ निकलल, मुदा दू दिनक बादो किछु अता-पता नहि अछि आ नहि पुलिस लग एखनहुँ कोनो जवाब अछि। एहि घटनासँ इलाकामे हड़कंप मचल अछि।
जनतब जे चारि नाबालिग सहेली जखनि शनिकेँ घर नहि वापिस आयल तऽ परिजन अगिला दिन रविकेँ पचरुखिया थानामे शिकायत कएलनि। परिजनक अनुसार बच्ची सभ लग कोनो मोबाइल नहि अछि। सभक एक संग लापता भऽ जएबासँ हुनकर सभक घरमे कोहराम मचल अछि।
थानामे आवेदन देबयवला एकटा बच्चीक परिजन बतौलनि जे हुनक 15 वर्षक बेटी शनिकेँ एक बजे दिनमे अपन तीन सहेली संग लगक एकटा गाममे कपड़ा सिआबय केर बात कहि कऽ घरसँ गेल। साँझ भऽ गेल मुदा वापिस नहि आयल। ओकर बाद जखनि बच्ची केर सहेलीक घर जाकऽ पता कएल गेल तऽ पता चलल जे आर तीन लड़की नहि अछि। जखनि ई जनतब गाममे लोककेँ भेल तऽ सनसनी पसरि गेल। एहि सभ बच्चीक उम्र 10 सँ 15 वर्षक बीच अछि।
एहि सम्पूर्ण मामिलामे पचरुखिया थाना अध्यक्ष शशिभूषण कुमार सिंह घटनाक पुष्टि कयलनि आ कहलनि जे किशोरीक बरामदगी लेल प्रयास कयल जा रहल अछि। ओ कहलनि जे एकटा गामसँ दोसर गाम पहुँचै खातिर बीचमे खेत-खलिहान अछि। कोनो ठाम सीसीटीवी कैमरा नहि अछि। हम दुनू गामक संदिग्ध लोकसँ बात कय जनतब प्राप्त करबाक प्रयास कय रहल छी।
