अंदाज लगाओल जा रहल अछि जे लापरवाही बरतयवाला पुलिसकर्मी सभ पर कारवाई भऽ सकैत अछि।
बिहारक समस्तीपुरमे कोर्ट परिसरसँ बुधदिन (28 मई, 2025) केँ पेशीक दौरान चारिटा कैदी फरार भऽ गेल। पाचम कैदी सेहो भागल छल मुदा पुलिस ओकरा खिहारि कऽ पकड़ि लेलक। चारिटा बंदीकेँ भागि गेलाक बाद पुलिस महकमामे खलबली मचि गेल अछि। फरार कैदी सभमे नगर थाना क्षेत्रमे बितल वर्ष भेल बहुचर्चित अनिल ज्वेलर्स लूटकांडक आरोपी राजनंदन उर्फ छोटू उर्फ हंटर सेहो शामिल अछि। अन्य फरार कैदी सभ पर सरायरंजन थानामे लूटकांड आ अन्य मामिला दर्ज अछि।
पुलिस कैदी सभकेँ कोर्टमे पेशीक लेल बुधकेँ आनने छल। एहि दौरान कोर्ट परिसरमे ई घटना घटल। धरायल गेल कैदीक नाम नागेंद्र कुमार अछि। ओतहिं चारिटा फरार कैदी सभमे राजनंदन उर्फ छोटू उर्फ हंटर, अरविंद सहनी, मनीष कुमार एवं मंजीत कुमार शामिल अछि।
घटनाक जानकारी भेटिते एसडीपीओ संजय कुमार पांडेय ठाम पर पहुँचलथि। जिलाक सब थानाकेँ अलर्ट कय देल गेल अछि आ फरार बंदी सभक गिरफ्तारीक लेल सघन छापेमारी कयल जा रहल अछि। मानल जा रहल अछि जे लापरवाही बरतय वाला पुलिसकर्मी पर करवाई होयत।
एसडीपीओ संजय कुमार पांडेय कहला जे न्यायालयमें बंदी सभकेँ पेशीक लेल आनल गेल छल। एहि दौरान एकटा बंदी राजनंदनकेँ आर्म्स एक्टमे पेशीक बाद हाजतमे बंद कएल जा रहल छल। एहि क्रममे हाजतक अंदर बंद चारिटा बंदी पुलिसकेँ धक्का दैत भागि गेल। एहिमेसँ एकटा बंदीकेँ पकड़ल गेल अछि। चारिमे सँ तीनटा बंदी सरायरंजन थाना कांड संख्या 113/24 केर लूटकांडक अभियुक्त अति। ई वैशाली आ मुजफ्फरपुरक रहनिहार अछि।
बताओल जा रहल अछि जे एहि दौरान राजनंदन सेहो मौकाक लाभ उठा कऽ फरार भऽ गेल। एसडीपीओ कहलनि जे पुलिसकर्मीक लापरवाहीक जांच कयल जा रहल अछि। कंट्रोल रूम आ सभ थानाकेँ निर्देश देल गेल अछि। सभक गिरफ्तारीक प्रयास कयल जा रहल अछि।
