बिहार पुलिस मुख्यालय (कार्मिक आओर कल्याण विभाग) 386 एएसआई केर तबादला कयलक अछि। एकर संग 1777 हवलदारक सेहो स्थानांतरण कयल गेल अछि आ सूची प्रकाशित भेल अछि।
एएसआई केर तबादला लेल 19 आओर 20 मईकेँ पुलिस मुख्यालयमे स्थानान्तरण समिति केर बैसार भेल, जतय ई निर्णय लेल गेल जे कॉलम-04 मे अंकित सहायक अवर निरीक्षक सभके कॉलम-06 मे अंकित जिलामे तत्क्षण प्रभावसँ स्थानान्तरित कएल जाय।
जाहि पुलिस अवर निरीक्षक आ समकक्ष कोटिक पुलिस पदाधिकारीक स्थानांतरण कएल गेल अछि, हुनका 15 दिनक अंदर नव स्थान पर योगदान करबाक लेल विरमित कएल जायत। स्थानांतरणक बाद जँ कोनो त्रुटि होयत तँ संबंधित पुलिस महानिरीक्षक / पुलिस उप-महानिरीक्षक, बिहार पुलिस मुख्यालय, पटनाक संज्ञानमे लाओल जायत, जाहिसँ मुख्यालय स्तर पर ओकर निराकरण कएल जा सकय।
एहि ट्रांसफरमे एहि बातक ख्याल रखल गेल अछि जे सेवानिवृतिक निकटता, चिकित्सीय आ पति-पत्नी सरकारी सेवामे रहबाक आधार पर स्थानांतरित कएल गेल पुलिस अवर निरीक्षक आ समकक्ष कोटिक पदाधिकारी पर ई आदेश प्रभावी नहि होयत। ई अपर पुलिस महानिदेशकक आदेश अछि, जे तत्काल प्रभावसँ लागू होयत।
