सोशल मीडिया एक्स पर कएल गेल पोस्टमे नौकरी आ रोजगारक नाम पर बिहारकेँ धोखा देबाक आरोप लगाओल गेल अछि। चुनावी सालमें आरजेडी बेरोजगारीकेँ प्रमुख मुद्दा बनौने अछि। नीतीश सरकार पर जबरजस्त हमला कएल जा रहल अछि। नेता प्रतिपक्ष तेजस्वी यादव मुखर छथि। मोदी आ नीतीश सरकारक खिलाफ ओ मोर्चा खोलने छथि। आब पोस्टरक माध्यमसँ दुनू नेता पर तेज हमला कएल गेल अछि।
राजद सोशल मीडिया एक्स पर मुख्यमंत्री नीतीश कुमार आ प्रधानमंत्रीक तस्वीर संग पोस्ट शेयर कएलक अछि। मुख्यमंत्री नीतीश कुमारकेँ ‘पलटू’ आ पीएम मोदीकेँ गप्पू कहल गेल अछि।
प्रधानमन्त्री मोदी पर सेहो राजद द्वारा कटाक्ष कएल गेल अछि। राजद केर पोस्टमे लिखल गेल अछि, “धोखेबाज़ रजऊ! क्षण-क्षणे बदले तहरों मिजाज रजऊ! नौकरी रोजगार खा गेल, पलटू आ गप्पू दुनू धोखेबाज़ रजऊ!!
बिहारमे एहि साल विधानसभा चुनाव होयब अछि। मुख्यमंत्री नीतीश कुमारक अगुवाईमे एनडीए सरकारक उपलब्धिसभ केँ गिनायल जा रहल अछि। बिहारमे रोजगारक मुद्दा पर सरकार पीठ थपथपा रहल अछि। दोसर दिसि मुख्य विपक्षी पार्टी राजद सेहो सरकारक खिलाफ धार तेज कऽ देलक अछि। सार्वजनिक मंचसभक अलावा सोशल मीडिया पोस्टसँ सेहो निशाना साधल जा रहल अछि।
बिहारमे एनडीए केर मुकाबला महागठबंधनसँ होयत। राजनीतिक दलसभक तरफसँ चुनावी तैयारी तेज कऽ देल गेल अछि। महागठबंधन तेजस्वी यादव केर चेहरा पर चुनावी मैदानमे उतरत। बीजेपी सेहो नीतीश कुमारक सहारे वैतरणी पार करबाक कोशिश कय रहल अछि। राजद नीतीश सरकारक विरूद्ध मोर्चा खोलि देलक अछि। पोस्टरमे मुख्यमंत्री नीतीश कुमार संग पीएम मोदीक फोटो सेहो अछि।
