‘ऑपरेशन सिंदूर’क बाद आतंकवादक खिलाफ भारतक कड़क रुखक संदेश लेल सात सर्वदलीय प्रतिनिधिमंडल विदेश जायत। जाहिमेसँ किछू प्रतिनिधिमंडलक नेतृत्व सत्तारूढ़ दलक नेता कय रहल छथि ओतय किछू केर अगुवाई विपक्षी दलक नेता करताह।
एकटा प्रतिनिधिमंडलक कमान कांग्रेस सांसद शशि थरूरकेँ देल गेल अछि। जाहि पर राजनीतिक बवाल मचल अछि, कियैक तँ कांग्रेस हुनकर नाम प्रस्तावित नहि कयने अछि। आब एकरा लेल कांग्रेस आ भाजपा एक दोसर पर आरोप लगा रहल अछि।
सरकार द्वारा प्रतिनिधिमंडल सभाकेँ नेतृत्वक लेल जाहि नेता सभक चयन कएल गेल अछि, ओहिमे सत्तारूढ़ दल सभसँ भाजपा नेता रविशंकर प्रसाद आ बैजयंत पांडा, एनडीएमे शामिल शिवसेना’क श्रीकांत शिंदे आ जनता दल (यूनाइटेड) केर नेता संजय झा, विपक्षी दल सभमे कांग्रेस’क शशि थरूर, द्रविड़ मुन्नेत्र कषगम (द्रमुक) केँ कनिमोई, राकांपा-एसपी केर सुप्रिया सुले शामिल छथि।
शशि थरूरक नामक लेल आब राजनीतिक गर्मागरमी भऽ रहल अछि। वास्तवमे कांग्रेस द्वारा जाहि चारिटा नामक प्रस्ताव पठाओल गेल छल, ओहिमे शशि थरूरक नाम नहि छल। केंद्र सरकार द्वारा थरूरक नाम स्वयं प्रस्तावित कएल गेल अछि।
कांग्रेसक नेता आ राज्यसभाक सांसद जयराम रमेश कहलनि कि सरकार पार्टीसँ विचार विमर्श कयने बिना ओ एकटा सांसदकेँ शामिल नहि कए सकैत छथि। ओ ईहो कहलनि जे ई नीक लोकतांत्रिक परंपरा अछि जे अधिकृत प्रतिनिधिमंडलमे शामिल होबयवाला सांसद अपन पार्टीक नेतृत्वसँ अनुमतिसँ लैत छथि। जयराम रमेश शशि थरूरक नाम लेने बिना कहलनि जे कांग्रेसमे होय आ कांग्रेसक होयमे जमीन आ आसमानक फर्क अछि। सरकार एहि मामिलामे ईमानदारी नहि केवल शरारत देखा रहल अछि आ ओ ध्यान भटकाबय केर खेल खेलि रहल अछि कारण ओकर विमर्श ‘पंचर’ भऽ गेल अछि।
कांग्रेसक तरफसँ आएल प्रतिक्रिया पर भाजपा प्रवक्ता प्रदीप भंडारी कहलनि जयराम रमेश अपन कांग्रेसी सांसद शशि थरूरक संसदीय प्रतिनिधिमंडलक नेतृत्व करबा लेल चुनल जएबाक विरोध करैत छथि। राहुल गांधी भारतक लेल बजनिहार व्यक्तिसँ नफरत कियैक करैत छथि ?
भाजपा सांसद मनोज तिवारी कहला, एहिसँ कांग्रेसकेँ कोनो फायदा नहि होएत। ई कांग्रेस शासित राज्य सभक लेल सेहो नीक नहि होएत। ई राजनीतिक विषय नहि अछि। ई केन्द्र सरकारक महानता अछि जे ओ सभ पार्टीसँ किछु सांसदकेँ (प्रतिनिधिमंडलक नेतृत्व करबाक लेल) चुनि रहल छथि।
