जाहि स्कूलक हेडमास्टर गजेरी होय ओहि स्कुलक विद्यार्थीक भविष्यक कल्पना करु, शिक्षाक मंदिरमे जँ एहि तरहक आचरण होएत तऽ विद्यार्थी कोन प्रकारक शिक्षा ग्रहण करत। ई कोनो मामूली बात नहिं।
सीतामढ़ी जिलासँ शिक्षा जगतकेँ हिला देबय वाला एकटा शर्मनाक घटना सोझा आयल अछि, बोखराक खरका स्थित केडीकेएन हाई स्कूलक हेडमास्टर सुजीत कुमार तिवारीक एकटा वीडियो वायरल भs गेल अछि, जाहिमे ओ स्कूल परिसरक एकटा कमरामे दूटा बाहरी लोकक संग गांजा पीबैत देखल गेल अछि। जहिना ई वीडियो सामने आयल तs शिक्षा विभागमे हलचल मचि गेल आ तत्काल प्रभावसँ कारवाई शुरू भs गेल।
शिक्षा विभागक ई वीडियो व्हाट्सएप केर माध्यमसँ भेटल, जकर बाद जिला शिक्षा अधिकारी गंभीरतासँ संज्ञान लs कs अनुशासनात्मक कारवाईक आदेश देलखिन। जांचमे पता चलल जे हेडमास्टर तिवारी नशाक सेवन तs कs रहल छलाह, बल्कि ओ खुलि कs दूटा बाहरी लोककेँ स्कूलमे प्रवेश दs कs नियमक उल्लंघन सेहो कयलथि। ई आचरण शिक्षक सेवा नियम 2023 आ 2024 क प्रावधानक प्रतिकूल पाओल गेल।
एहिमे कारवाईक तहत सुजीत तिवारीकेँ तत्काल प्रभावसँ निलंबित कs देल गेल अछि। निलंबन अवधिमे हुनका डुमरा स्थित प्रखंड शिक्षा अधिकारी कार्यालयमे अपन हाजिरी दर्ज करय पड़तनि। एहि दौरान हुनका वेतनक जगह पर मात्र निर्वाह भत्ता भेटतनि, सेहो नियमित उपस्थितिक स्थितिमे मात्र। शिक्षा विभाग आगू हुनका खिलाफ कारण बताओ नोटिस जारी कs विभागीय जांच शुरू करय केर घोषणा कयलक अछि।
शिक्षा सन पवित्र पेशासँ जुड़ल व्यक्तिक ई क्रिया समस्त समाज लेल लज्जाजनक अछि। शिक्षक समाजक दर्पण होइत छथि आ जखनि ओ स्वयं अपन आचरणसँ खसैत छथि तऽ बच्चा सभक सोच आ स्कूलक छवि पर गहींर प्रभाव पड़ैत अछि । एहि मामिलामे विभागक शीघ्र कारवाईसँ इ संदेश देल गेल अछि जे शैक्षणिक संस्थानमे अनुशासनहीनता या अनैतिक काजक कोनो जगह नहि अछि।
एहि घटनाक बाद आम लोक आ अभिभावकमे आक्रोश अछि। स्थानीय लोक स्कूल परिसरमे सीसीटीवी निगरानी, समय-समय पर निरीक्षण आ शिक्षकक जवाबदेही सुनिश्चित करबाक मांग कयलनि अछि। एहेनमे शीघ्र कारवाई कs शिक्षा व्यवस्थाक प्रतिष्ठा केर बचाओल जा सकैत अछि, मुदा एहि लेल ठोस नीतिगत कदम जरूरी अछि।
