राहुल गांधी बृहस्पतिकेँ दरभंगा जिलाक अंबेडकर छात्रावास पहुँचलथि। प्रशासनक आपत्ति केर बावजूद राहुल गांधी छात्रावास पहुँचलथि आ ओ लोककेँ सम्बोधित कएलनि। एहि मामिलाक बाद आब प्रशासन हुनका विरुद्ध केस दर्ज कएलक अछि।
बिहारमे विधानसभा चुनाव होबय वला अछि। एहेनमे बिहारमे सभ दिन अलग-अलग पार्टीक पैघ नेता सभ बिहार आबैत-जाइत छथि। एहि बीच कांग्रेस सांसद राहुल गांधी बृहस्पतिकेँ बिहार पहुँचलाह। एहि दौरान अंबेडकर छात्रावास जाइत काल पुलिस बेसी समय धरि राहुल गांधीकेँ रास्तामे रोकने रहल। राहुल गांधी किछु समय धरि तँ कार्यक्रम स्थलसँ पहिने अपन गाड़ीमे बैसल रहलथि। मुदा फेर प्रशासन द्वारा अनुमति नहि भेटला पर ओ अपन गाड़ीसँ निकलि पैदल आंबेडकर छात्रावासमे बिना अनुमतिक पहुँचि गेलाह।
जनतब जे बिहारक दरभंगा जिलाक आंबेडकर छात्रावासमे राहुल गांधी बिना प्रशासनक अनुमतिकेँ पहुँचलाह। एहि दौरान ‘शिक्षा, न्याय संवाद’ कार्यक्रम आयोजित करबाक आरोपमे पुलिस बृहस्पतिकेँ राहुल गांधीक खिलाफ आ 100 सँ बेसी पार्टी कार्यकर्ताक खिलाफ दूटा प्राथमिकी दर्ज कयलक अछि।
लोकसभामे विपक्षक नेता राहुल गाँधी कांग्रेसक राज्यव्यापी जनसंपर्क अभियानक तहत आंबेडकर छात्रावासमे छात्रसँ बातचीत कएलनि। एहिसँ पहिने जिला प्रशासन कार्यक्रमक लेल अनुमति देबासँ इंकार कएलक आ एकर स्थान पर वैकल्पिक स्थलक प्रस्ताव देलक। एहि दौरान कांग्रेस एहि सुझावकेँ अस्वीकार कएलक, जकर फलस्वरूप गतिरोध उत्पन्न भेल। जनतब जे राहुल गाँधी प्रशासन आ सुरक्षाकर्मीक अपत्तिक बावजूद दोसर रास्तासँ छात्रावास परिसरमे प्रवेश कएलनि आ एहि दौरान ओ छात्रसभकेँ सम्बोधित कएलनि।
एहि मामिलामे दरभंगा जिला प्रशासन एकटा बयान जारी कय कहलक, “पहिल प्राथमिकी जिला कल्याण अधिकारी द्वारा लहेरियासराय थानामे देल गेल शिकायतक आधार पर दर्ज कएल गेल अछि। एहीमे कहल गेल अछि जे अंबेडकर छात्रावासमे कार्यक्रम लेल ककरो अनुमति नहि देल गेल छल, तइयो निषेधाज्ञाक उल्लंघन करैत ई आयोजित कएल गेल।” ओतहि दोसर प्राथमिकी निषेधाज्ञाक उल्लंघन करबाक आरोपमे दर्जन भरि अज्ञात लोकक खिलाफ दर्ज कएल गेल। एकटा प्राथमिकीमे राहुल गांधी आ 19 कांग्रेस कार्यकर्ताक खिलाफ मामिला दर्ज कयल गेल अछि।
