एक करोड़क ब्राउन शुगर संग चारि तस्कर गिरफ्तार, कार-नकदी सहित कतेको सामान बरामद

मुजफ्फरपुर समदिया
*

मुजफ्फरपुर जिलाक पुलिस एकटा पैघ कारवाई कयलक आ एक किलो ब्राउन शुगर जब्त कयलक जेकर कीमत करीब एक करोड़ रुपया बताओल जा रहल अछि। एहि दौरान पुलिस चारि गोटेकेँ सेहो गिरफ्तार कयलक अछि। ओकरा सभक लगसँ तीन लाख टका नगद, डिजिटल तराजू, स्विफ्ट डीज़ियर कार आ दूटा मोबाइल फोन सेहो बरामद कयल गेल अछि।

ई पूरा घटना काजी मोहम्मदपुर थाना क्षेत्रक अछि। जानकारीक अनुसार पुलिस गश्ती कs रहल छल, तखने जंक्शन लग तीन संदिग्ध युवक देखल गेल। पुलिस जखनि ओकरा सभसँ पूछताछ कयलक तs ओ सब सही जवाब नहि दs सकल आ भागयकेँ कोशिश कयलक। पुलिस दू गोट युवकके पकड़ि लेलक, मुदा एकटा युवक भागयमे सफल रहल। गिरफ्तार युवकक तलाशी लेल गेल तऽ ओकरा लग एकटा पैकेट भेटल जाहिमे किछु पाउडर छल। पूछला पर ओ सब कहलक जे सत्तू अछि, मुदा पुलिसके शंका भेल। तखनि डीआरआई (डायरेक्टोरेट ऑफ रेवेन्यू इंटेलिजेंस) केर मदद लेल गेल। जांचक बाद पता चलल जे पाउडर ब्राउन शुगर अछि, जेकर वजन एक किलो अछि।

गिरफ्तार अपराधीक पहिचान पूर्वी चंपारणक चिरैया थाना क्षेत्रक शीतलपट्टी निवासी सुरेन्द्र यादवक पुत्र जय प्रकाश कुमार (23), मधुबन थाना क्षेत्रक योगेन्द्र शर्माक पुत्र मुकेश कुमार (25), बक्सर जिलाक कृष्ण ब्रह्मपुर थाना क्षेत्रक राज नारायण रायक पुत्र अंकित कुमार एवं गया जिलाक कोठी थाना क्षेत्रक चतरू साहक पुत्र संतोष कुमार गुप्ता अछि। चारू आरोपीकेँ न्यायिक हिरासतमे पठा देल गेल अछि। पुलिस पूछताछक दौरान आरोपी कहलक जे, ओ सभ मणिपुरसँ ब्राउन शुगर लs कs मुजफ्फरपुर आयल छल, आ एहिसँ पहिने कतेको बेर ड्रग्स केर खेप अनने अछि। एहि बेर ओकर योजना छल जे गयामे माल पहुँचा देल जाय, मुदा पुलिस ओकरा सभकेँ ओहिसँ पहिने पकड़ि लेलक।

एहि मामिलाक जानकारी दैत डीएसपी टाउन वन सीमा देवी कहलनि जे, पुलिस एक किलो ब्राउन शुगरक संग चारिटा अपराधीकेँ गिरफ्तार कयलक अछि। जब्त ब्राउन शुगरक बाजार मूल्य करीब एक करोड़ रुपया अछि। ओकरा सभसँ नगद तीन लाख टका, एकटा कार, दूटा मोबाइल फोन आ एकटा डिजिटल तराजू सेहो बरामद कयल गेल अछि। सभ आरोपी मणिपुरसँ ब्राउन शुगर केर खेप लs कs मुजफ्फरपुर पहुंचल छल। आब चारू गोटेकेँ जेल भेजल जा रहल अछि।