अमेरिकी राष्ट्रपति डोनाल्ड ट्रंप सऊदी अरबमे भारत आ पाकिस्तानक बीच संघर्ष विरामक मध्यस्थता करबाक श्रेय एक बेर फेर लेलनि। एही पर कांग्रेस विवादास्पद टिप्पणी कएलक आ कहलक जे प्रधानमंत्री मोदी आ विदेश मंत्री एस जयशंकरकेँ एही बारेमे जनेबाक चाही जे की ओ अमेरिकाक दबावमे देशक सुरक्षा हितकेँ गिरवी राखि देलनि ? कांग्रेसक संचार प्रभारी जयराम रमेश कहलनि, किछु दिन पहिने हमरा सभकेँ अमेरिकी राष्ट्रपति डोनाल्ड ट्रंपसँ पाकिस्तान संग संघर्ष विरामक जनतब भेटल। आब काल्हि सऊदी अरबमे एकटा सार्वजनिक कार्यक्रममे राष्ट्रपति ट्रंप खुलासा कएलनि जे ओ संघर्ष विरामक लेल व्यापार प्रतिबंध झटकाक धमकी देने छलाह।’
जयराम रमेश सोशल मीडिया पर साझा एकटा पोस्टमे लिखलनि कि ‘एहि बारेमे बातूनी प्रधानमंत्री आ विदेश मंत्रीक की कहब अछि ? की ओ अमेरिकी दबावमे भारतक सुरक्षा हितकेँ गिरवी राखि दिलनि ?’ बीतल वर्ष भाजपा एहेन बात खूब प्रचारित कयलक जे प्रधानमंत्री मोदी रूस-यूक्रेन युद्ध रोकलनि। एही खातिर एकटा विज्ञापन सेहो तैयार कयल गेल, जाहिमे देखायल गेल जे एकटा लड़की अपन पितासँ कहलक ‘हम कहलौं ना कि कोनो परिस्थिति होय, मोदी जी हमरा घर लऽ कय आबि जेताह। युद्ध रोकलक पापा आ फेर हमर बस निकलल पापा’। एही पर तंज कसैत जयराम रमेश सोशल मीडिया पोस्टमे लिखलनि कि ‘अमेरिकी पापा युद्ध रोकलनि की ?’
जनतब जे डोनाल्ड ट्रंप मंगलदिन रियादमे (रियाद या रियाज़- सउदी अरब केर राजधानी आ सबसँ पैघ शहर) एकटा कार्यक्रममे कहलनि कि ‘हालमे हमर प्रशासन सफलतापूर्वक भारत आ पाकिस्तानक बीच ऐतिहासिक संघर्ष विराम करौने अछि। एहि लेल हम व्यापारक इस्तेमाल कयलहुँ आ कहलहुँ जे परमाणु हथियारक आदान-प्रदान करय केर बदला चीज सभकेँ व्यापार करू। दुनू ताकतवर आ नीक नेता अछि आ दुनू मानि गेल आ ई सब रुकि गेल। उम्मीद अछि जे ई एनाहि रहत।’
एहीसँ पहिने सेहो ट्रंप दावा कयलनि कि ओ भारत आ पाकिस्तानक बीच संघर्ष रोकबेने छी। हालांकि भारत सरकार साफ-साफ कहि चुकल अछि जे संघर्ष विरामक लेल भारत आ पाकिस्तानक बीच बातचीत भेल आ एहिमे कियो मध्यस्थता नहि कयलक। भारत ईहो कहलक जे कश्मीर द्विपक्षीय मुद्दा अछि आ एहिमे कोनो तेसर पक्षक लेल जगह नहि अछि। सरकार कहलक जे कश्मीर भारतक अभिन्न अंग अछि आ रहत।
