प्रधानमंत्री नरेंद्र मोदी शनिकेँ एक बेर फेर कहलनि जे भारत आतंकवाद आ ओकर समर्थन करय वलाकेँ खिलाफ निर्णायक कार्यवाही करबाक लेल प्रतिबद्ध अछि। हुनकर ई बयान पहलगाम आतंकी हमलाक बाद भारत आ पाकिस्तानक बीच बढ़ैत तनावक बीच आयल अछि। हमलामे 28 नागरिकक मृत्यु भेल छल आ कतेको घायल भेल छल।
अंगोलाक राष्ट्रपति जोआओ मैनुअल गोंकाल्वेस लौरेंकोक साथ संयुक्त संवाददाता सम्मेलनमे बाजैत प्रधानमंत्री मोदी कहलनि, “आतंकवादक खिलाफ हमर रुखमे हम पूरा एकजुट छी। हम पहलगाम आतंकवादी हमलामे मारल गेल लोकक प्रति सहानुभूति देखाबय लेल राष्ट्रपति लौरेंको आ अंगोलाक लोकक प्रति आभार व्यक्त करैत छी।”
प्रधानमंत्री कहलनि, “हम आतंकवादी आ आ ओकर समर्थन करय वला केर खिलाफ दृढ़ आ निर्णायक कार्यवाहीकेँ लेल प्रतिबद्ध छी। हम आतंकवादक खिलाफ लड़ाईमे अंगोलाक समर्थनक लेल धन्यवाद दैत छी।”
जनतब जे आतंकी 22 अप्रैल 2025 केँ जम्मू-कश्मीरमे एकटा लोकप्रिय पर्यटन स्थल – पहलगाम स्थित बैसरन घाटीमे पर्यटक सभ पर गोली चला मारि देलक। प्रतिबंधित आतंकवादी समूह ‘लश्कर-ए-तैयबा’सँ जुड़ल ‘टीआरएफ’ एहि हमलाक जिम्मेदारी लेने छल। हमलावरमे दू पाकिस्तानी नागरिककेँ होयबाक पुष्टि भेल अछि।
23 अप्रैलकेँ प्रधानमंत्री मोदीक अध्यक्षतामे एकटा उच्च स्तरीय सुरक्षा समिति (सीसीएस) केर बैसार भेल। एहिमे नरसंहारक बाद पाकिस्तानक खिलाफ कतेको महत्वपूर्ण फैसला लेल गेल।
