एहि बेरक बिहार विधानसभा चुनाव खास रहत। एहि बेरक चुनावमे खास ईवीएम एम-3 केर इस्तेमाल होएत।
किछु महिनामे बिहारमे विधानसभा चुनाव होबए जा रहल अछि आ चुनावक तैयारी जोरदार शूरू अछि। सभसँ खास होएत एहि बेर नव ईवीएमसँ वोट डालल जायत। एहि लेल शीघ्रहि बिहारक कतेको जिलाकेँ ईवीएम मशीन भेटत।
बिहारमे चुनाव करय बला कर्मी सभक सत्यापन कएल जा रहल अछि आ जिला निर्वाचन कार्यालयक तरफसँ सभ विभागक कर्मी सभक सूची पठाओल गेल अछि। निर्वाचन कार्यालय सभक सत्यापनक बाद रिपोर्ट देबाक लेल कहल गेल अछि।
एम-3 ईवीएम अत्याधुनिक तकनीकसँ लैस ईवीएम अछि आ बिहार चुनावक मध्य प्रायः 21 मई तक एकरा भेटबाक संभावना अछि। एकर बाद 25 मईसँ फर्स्ट लेवल चेकिंग शुरू भ’ जायत। करीब एक महीना बाद 25 इंजीनियर्स मिलिकय एकर कार्य करत। एहीमे ख़ास ई अछि जे जँ एहिसँ छेड़छाड़ कयल जायत वा एकर एक्कौहटा स्क्रू खोलल गेल तँ ई निष्क्रिय भ’ जायत। आब आगामी विधानसभा चुनावमे एही ईवीएमक उपयोग कएल जायत।
निर्वाचन कार्यालयक तरफसँ रिपोर्ट भेटलाक बाद चुनावक दौरान चुनाव कर्मी सभक ड्यूटी लगायल जाएत। जिला निर्वाचन कार्यालय केर तरफसँ ईहो पुछल गेल अछि कि एहेन कर्मी जे चुनाव कार्यमे हिस्सा लेत तिनकर सभक पदस्थापनक की स्थिति अछि, की ओ कार्य कय रहल छथि वा रिटायर भऽ चुकल छथि। संगहि ईहो पुछल गेल अछि जे हुनकर स्वास्थ्य संबंधित किछु परेशानी तँ नहि अछि। एहि तरहें कर्मी सभक संबंधमे कतेको तरहक रिपोर्ट मांगल गेल अछि।
