कांग्रेस पार्टी अपन नेताक सभकेँ पहलगाम आतंकी हमला पर फिजूलक बयानबाजी नहि करबाक नसीहत देलक अछि। पार्टी कांग्रेस नेताक विवादित बयानसभसँ किनारा सेहो कऽ लेलक अछि।
पहलगाम आतंकी हमलाक कारण देशक समस्त हिस्सामे दुःख आ गुस्साक माहौल बनल अछि। मुदा राष्ट्रीय सुरक्षासँ जुड़ल एहेन मामिलामे कांग्रेसक किछु नेता द्वारा देल गेल बयानसभक कारणे पार्टीक छवि सेहो ख़राब भेल अछि। एहिसँ कांग्रेसक आलाकमान नाराज छथि। कांग्रेस आलाकमान पार्टीक नेता सभकेँ नसीहत देलनि अछि जे पहलगाम हमला पर फिजूलक बयानबाजी करबासँ बँचू।
कांग्रेस नेता जयराम रमेश सोशल मीडिया मंच एक्स पर लिखलनि, कांग्रेस कार्य समिति 24 अप्रैल 2025 केँ बैठक कयलक आ दु दिन पहिने पहलगाममे पर्यटक पर भेल बर्बर आतंकवादी हमला पर एकटा प्रस्ताव पारित कयलक अछि। एकर बाद 25 अप्रैल 2025 केँ कांग्रेस अध्यक्ष आ लोकसभामे विपक्षक नेता सर्वदलीय बैसारमे भाग लेलनि आ पार्टीक पक्ष रखलनि।’ मीडियासँ चर्चा करैत कांग्रेस नेता अपन राय रखलनि, जे पार्टी नहि बल्कि कांग्रेसक किछु नेता मीडियासँ चर्चा कय रहल छथि। ओ सब केवल अपन व्यक्तिगत राय रखैत छथि, ओ भारतीय राष्ट्रीय कांग्रेसक विचार सभक प्रतिनिधित्व नहि करैत छथि। एहेन अत्यंत संवेदनशील समयमे कोनो संदेह नहि होबय चाही जे केवल कांग्रेस कार्य समितिक प्रस्ताव, मल्लिकार्जुन खड़गे आ राहुल गांधी द्वारा व्यक्त विचार आ अधिकृत एआईसीसी पदाधिकारीक विचारे टा आईएनसी’क आधिकारिक स्थितिक प्रतिनिधित्व करैत अछि।
जनतब जे कांग्रेस पार्टीक नेता सभ द्वारा पहलगामक घटना पर देल जा रहल आपत्तिजनक बयानसँ कांग्रेसक शीर्ष नेतृत्व नाराज़ अछि। पार्टीक तरफसँ तमाम नेता सभकेँ कहल जा रहल अछि कि फिजूलक बयानबाज़ी नहि करु। कांग्रेसक किछु नेताक टिप्पणीसँ गलत संदेश गेल। राहुल गांधी आ मल्लिकार्जुन खरगे सर्वदलीय बैठकक बाद कहलनि कि पार्टी सरकारक हर डेगक संग अछि। एम्हर बीतल किछु दिनमे कांग्रेसक नेता मणिशंकर अय्यर, कर्नाटकक सीएम सिद्धरमैया सहित किछु अन्य पहलगाम हमला पर किछु एहेन टिप्पणी कयलनि अछि जाहिसँ समाजमे पार्टीक बारेमे गलत संदेश गेल अछि।
