जम्मू-कश्मीरक पहलगाममे आतंकी हमलाक बाद भारत एक्शन लैत सिंधु जल संधि समझौताकेँ सस्पेंड करय केर घोषणा कयलक अछि, संगहि पाकिस्तानक खिलाफ कतेको आर पैघ डेग उठाबय जा रहल अछि। एहिसँ पड़ोसी देशक अंदर हलचल मचल अछि आ लोक खौफक छाँवमे जीबि रहल अछि। एकर अंदाज एहि बातसँ लगायल जा सकैत अछि जे लोक देश छोड़ि भागय लगल अछि।
पाकिस्तान आर्मी चीफ असीम मुनीरक परिवार हालहिमे देश छोड़लक अछि आ आब पीपीपीक अध्यक्ष बिलावल भुट्टोक परिवार पाकिस्तान छोड़ि कनाडा भागि गेल अछि।
सिंधु जल संधि सस्पेंड भेलाक बाद बौखलाएल बिलावल धमकी देने छल कि जँ पाकिस्तानक पानी रोकल गेल तँ सिंधु नदीमे खून बहत। एही धमकीक एक दिन बाद खबरि आयल जे हुनक परिवारक सदस्य बख्तावर भुट्टो आ असिफा भुट्टो काल्हि रवि (27 अप्रैल, 2025) केर भोरमे पाकिस्तान छोड़ि कनाडा चलि गेल।
पाकिस्तानक भीतर भारतक प्रति डर अछि कि भारत कखनो हमला कय सकैत अछि। एहेन स्थितिमे ओतय सेनाक मनोबल सेहो खसल अछि आ बहुत रास अधिकारी अपन परिवारकेँ विदेश पठा देलक अछि एवं पठा रहल अछि। एहिमे पाकिस्तान आर्मीक चीफ असीम मुनीर सेहो शामिल अछि। खबरि अछि जे एकटा प्राइवेट जेट केर इस्तेमाल कय अपन परिवारकेँ ब्रिटेन आ न्यू जर्सी पठा देलक अछि। पहलगाम आतंकी हमलाक तुरंत बाद भारत पाकिस्तानकेँ सख्त संदेश देलक। पीएम मोदी सेहो कहलनि कि आतंकवादी आ ओकर आकाकेँ खिलाफ सख्त कार्यवाही कयल जाएत, चाहे दुनियाक कोनो कोनामे कियैक नहि छिपल होय, ओकरा ढूँढ़ि निकालल जायत।
पहलगाम आतंकवादी हमलाक बाद सम्पूर्ण देशमे पाकिस्तानक खिलाफ गुस्साक माहौल उत्पन्न भेल अछि आ देशवासी पीएम मोदीसँ बदला लेबाक मांग कय रहल अछि। एहि मुद्दा पर देशक समस्त राजनीतिक दल सेहो सरकारक संग ठाढ़ अछि। विपक्षक कहब अछि जे सरकार जे कोनो डेग उठायत, विपक्ष संग अछि। फिलहाल सरकार सिंधु जल संधिकेँ सस्पेंड कय देलक अछि, पाकिस्तानी वीजा समाप्त कय देल गेल अछि आ देशसँ निकालल गेल अछि। संगहि कूटनीतिक संबंध सभकेँ काफी हद तक कम कय देल गेल अछि।
