मधुबनी जिलान्तर्गत सिजौल स्थित संदीप विश्वविद्यालय परिसरमे तेसर रोजगार मेला – २०२५ केर सफल आयोजन कयल गेल। रोजगार मेला केर माध्यमें ६०९ छात्र/छात्राकेँ नियोजित कयल गेल।
आयोजनमे देशक लगभग १०० सँ बेसी नामचीन कम्पनीक एच आर सहभागी बनलाह। जाहिमे एचडीएफसी, रिलायंस, उत्कर्ष बैंक, एच पी प्रमुख अछि। संगहिं बिहारक विभिन्न क्षेत्रसँ लगभग २५०० छात्र/छात्रा शामिल भेलैथि।
कार्यक्रमक अध्यक्षता कुलपति प्रो. समीर कुमार वर्मा कयलनि। मुख्य अतिथि प्रसिद्ध उद्योगपति दयानन्द राय, अतिविशिष्ट अतिथि संदीप फाउंडेशनक ओएसडी आर्यन संदीप झा, विशिष्ट अतिथि डाॅ. श्वेता झा तथा सुनील सिंह छलथि।
अतिथिगणकें डाॅ. संदीप झा द्वारा मिथिलाक परम्परानुसार पाग, अंग-वस्त्रम तथा पुष्प-गुच्छ द्वारा सम्मानित कयल गेल। छात्र/छात्रा द्वारा मंगलाचरण प्रस्तुति केर उपरान्त कार्यक्रमक उद्घाटन चेयरमैन डाॅ. संदीप झा, दयानन्द राय, कुलपति समीर कुमार वर्मा, डाॅ. श्वेता झा, सूरज कुमार झा, सुनील कुमार झा, सुनील सिंह द्वारा संयुक्त रूपें कयल गेल।
उद्घाटनक उपरान्त चेयरमैन डां. संदीप झा अपन संबोधनमे उपस्थित अतिथिगण, देशक विभिन्न क्षेत्रसँ आयल नामचीन कम्पनीक एच आर, छात्र/छात्रा समेत अन्य कर्मचारीकेँ धन्यवाद ज्ञापित कयलनि।
कार्यक्रमकेँ सम्बोधित करैत डाॅ. झा कहलनि जे संदीप विश्वविद्यालय, सिजौल विगत् तीन वर्षसँ रोजगार मेला आयोजित करैत मेधावी छात्र/छात्राकें रोजगार उपलब्ध करेबाक प्रयास कऽ रहल अछि। फलत: बिहारक अनेकों विश्वविद्यालय तथा काॅलेजक छात्र/छात्रा लाभान्वित होइत आबि रहल छथि। विश्वविद्यालयक माध्यमें छात्र/छात्राकेँ गुणवत्तापूर्ण शिक्षा तथा स्कील डेवलपमेंटक अवसर उपलब्ध कराओल जा रहल अछि।
छात्र/छात्राकेँ सम्बोधित करैत डाॅ. झा कहलनि जे कोनो प्रकारक उपलब्धि प्राप्त करबामे अनेकों समस्याक सामना करय पड़ैत छैक मुदा एहिसँ विचलित नहि हेबाक चाही। नकारात्मकताकेँ पराजित कय श्रेष्ठ गुणवत्ताकेँ अंगीकार करबाक संकल्प लैत सफलताक सोपान पर आगु बढ़ैत रहबाक चाही।
मुख्य अतिथि प्रसिद्ध उद्योगपति दयानन्द राय, संदीप विश्वविद्यालयक उत्कृष्ट प्रबंधन तथा छात्र/छात्राकें समयानुकूल विकासक लेल कयल जा रहल कार्यकें मुक्तकंठसँ प्रशंसा कयलनि। कुलपति समीर कुमार वर्मा कहलनि जे यूनिवर्सिटीक प्रत्येक छात्र/छात्राक उज्जवल भविष्य निर्माणक प्रति हमरा लोकनि सजग व सचेत रहैत छी।
कार्यक्रमकेँ संबोधित करैत ओएसडी आर्यन संदीप झा छात्र/छात्राक बेहतर भविष्यक कामना कयलनि आ विश्वास व्यक्त कयलनि जे छात्रगण अपन प्रतिभासँ संस्थानक नाम उज्जवल करत।
एहि अवसर पर सलाहकार समितिक सदस्य डाॅ. सुनील झा, ओएसडी विवेक निकम, रजिस्टार डाॅ. नैशंरवाँ रौनक, एकेडमिक डीन डाॅ. अजय कुमार, धर्मेश ठाकुर, शिक्षा विभागक संकायाध्यक्ष डाॅ. ज्योतिन्द्र पाठक, डाॅ. अमरेन्द्र कुमार, डाॅ. मो. दानियाल, डाॅ. अभिषेक ठाकुर, चन्द्र प्रकाश, उदयकान्त ठाकुर, डाॅ. बीसी चौधरी, उमाशंकर पाठक, आनन्द चौधरी, आशीष कुमार, कुमार, विमल कुमार समेत विपुल संख्यामे अन्य कर्मचारी उपस्थित छलथि।
