पंजाबक फिरोजपुरमे बुधदिन भारत-पाकिस्तान अन्तर्राष्ट्रीय सीमा पर जीरो लाइन पार कऽ सीमा सुरक्षा बल (बीएसएफ) केर एकटा जवान सरहद लांघि कऽ पाकिस्तान सीमामे प्रवेश कय गेल। जवानकेँ पाकिस्तानी रेंजर्स हिरासतमे लेलक। 24 घंटा बितलाक बादो जवानकेँ रिहा नहि कएल गेल छल।
बीएसएफ केर जवान गलतीसँ सीमा पार चलि गेल छल।
समाचार सम्प्रेषण धरि जवानकेँ वापस अनबा लेल बीएसएफ केर अधिकारी पाकिस्तान रेंजर्ससँ बातचीत कऽ रहल छल। बीएसएफ केर एकटा वरिष्ठ अधिकारी कहलन्हि कि जवान केर सुरक्षित वापसी सुनिश्चित करबा लेल फ्लैग मीटिंग बजाओल गेल अछि। फ्लैग मीटिंगक बैसार फिरोजपुर सीमा पर होयत।
सूचना भेटैत बीएसएफ केर अधिकारी बॉर्डर पर पहुँचला। जवानकेँ रिहाई लेल पाकिस्तानी रेंजर्स आ बीएसएफक अधिकारीक बीच बॉर्डर पर बुधकेँ राति धरि फ्लैग मीटिंग कयल गेल, मुदा जवानक रिहाई नहीं भेल।
जीरो लाइनसँ पहिने एही क्षेत्रमे किसान सभकेँ विशेष परमिट संग कृषि काजक अनुमति देल जाइत अछि। फसल बोएब आ काटब केर दौरान बीएसएफ केर जवान हुनका संग तैनात रहैत अछि। एहि सबकेँ किसान गार्ड सेहो कहल जायत अछि। काँटेदार तार जीरो लाइनसँ बहुत पहिने अछि। जीरो लाइन पर मात्र पिलर लागल अछि। पाकिस्तान अपना दिसि काँटेदार तार नहि लगौने अछि। एहि कारण गर्मीसँ परेशान जवान पेड़ केर छाँवमे बैसबाक लेल गलतीसँ जीरो लाइन पार कय पाकिस्तानी सीमामे चलि गेल। एतबेमे पाकिस्तानी रेंजर्स बीएसएफ केर चेक पोस्ट पर पहुँचि गेल आ हुनका हिरासतमे लऽ कऽ हथियार कब्जामे लऽ लेलक।
