खेलो इंडिया यूथ गेम्स 2025 केर सफल आयोजनक लेल अपर मुख्य सचिव बी. राजेंदर बिपार्ड गयाक सभागारमे एकटा बैठक कएलनि। एहि दौरान हुनक कहब छल ई आयोजन बिहारक लेल बहुत गर्वक बात अछि। पहिल बेर राज्यमे खेल महाकुंभ भ रहल अछि। युवाकेँ एहिसँ प्रेरणा भेटत।
बिहार सरकारक खेल विभाग एहि बीच खेलो इंडिया यूथ गेम्स 2025 केर लेल लगातार बैठक कय रहल अछि। सरकारक तरफसँ हर प्रकारक सुविधा व्यवस्थीत कयल जा रहल अछि। आयोजनक दौरान आबि रहल खिलाड़ी आ मेहमान सभक खास ध्यान रखबाक व्यवस्था कयल गेल अछि। एहि सिलसिलामे बिहार सरकारक अपर मुख्य सचिव बी. राजेंदर बिपार्ड गयाक सभागारमे एकटा बैसार कएलनि।
एहि बैठकमे आयुक्त मगध प्रमंडल डॉ. सफीना ए.एन., उप विकास आयुक्त, नगर पुलिस अधीक्षक, नगर आयुक्त समेत जिला स्तरक पदाधिकारी आ पुलिसक वरिय अधिकारी सभ शामिल भेलाह। बैठकक मुख्य उद्देश्य खेलो इंडिया यूथ गेम्स 2025 केर सफल आयोजनकेँ सुनिश्चत करब रहल।
बैसारक दौरान मुख्य सचिव बी. राजेंदर कहला कि ई आयोजन बिहारक लेल गर्वक बात अछि। पहिल बेर राज्यमे एहि स्तरक खेल महाकुंभ भऽ रहल अछि। बिहार सरकार खिलाड़ी, सपोर्टिंग स्टाफ, दर्शकक सुविधा, सुरक्षा, ट्रैफिक प्रबंधन आ पार्किंग व्यवस्थाकेँ लए हर संभव डेग उठा रहल अछि।
बैठकमे खिलाड़िक रहय लेल, भोजन आ पानि, आवागमनक व्यवस्था पर विशेष ध्यान देल गेल। अपर मुख्य सचिव कैटरिंग मेनूकेँ फिक्स राखब, भोजनक गुणवत्ता आ स्वच्छता बनौने रखबाक निर्देश देलनि। जिला परिवहन अधिकारीकेँ पर्याप्त वाहनक उपलब्धता सुनिश्चित करब आ खिलाड़ी लोकनिक भ्रमणक लेल हेल्प डेस्क स्थापित करबा लेल कहल गेल।
नगर पुलिस अधीक्षककेँ दर्शक सभक लेल पार्किंग, ड्रॉप गेट आ फ्रिस्किंग पॉइंट चिन्हित करबाक निर्देश देल गेल। ओ कहलनि जे एहि आयोजनसँ बिहार आ गया जिलाक ब्रांडिंग होएत, जाहि लेल जिला प्रशासन व्यापक प्रचार-प्रसार कय रहल अछि। बैसारमे आन वरिष्ठ अधिकारी सभ सेहो उपस्थित छलाह। खेलो इंडिया यूथ गेम्स 2025 बिहारमे खेल संस्कृतिकेँ बढ़ावा देबाक आ युवा प्रतिभा सभकेँ राष्ट्रीय मंच प्रदान करबाक महत्वपूर्ण
अवसर अछि।
