पीएम मोदीक आजुक मधुबनी आगमनसँ पहिने संपूर्ण बिहारमे उच्च सुरक्षा अलर्ट

मधुबनी समदिया
*

प्रधानमंत्री नरेंद्र मोदी आई मधुबनी जिलाक झंझारपुरमे विदेश्वर/ भैरवस्थान थाना लग पंचायती राज दिवसक मौका पर आयोजित कार्यक्रममे आबि रहल छथि।

एहि मौका पर भव्य कार्यक्रमक आयोजन योजित छल, मुदा पहलगाममे भेल आतंकवादी हमलाक कारण कार्यक्रम मात्र औपचारिक रहत। एहि कार्यक्रममे मोदी नहि माला पहिरता आ नहि ढोलसँ स्वागत होयत। पूरा कर्यक्रम सादगीक संग आयोजित होयत।

जनतब जे एहि कार्यक्रमक कारण मधुबनी जिलाक यातायात मार्गकेँ बदलल गेल अछि आ राष्टीय राजमार्ग संख्या 27 पर दिल्ली मोड़सँ फुलपरास धरि ट्रैफिक जिरो कयल गेल अछि। निजी स्कूलक बस आ अन्य वाहनक सञ्चालन जिलाधिकारिक आदेशानुसार प्रतिबंधित कयल गेल अछि।

बिहारक डीजीपी विनय कुमार कहलनि जे आतंकवादी हमलाक बाद संपूर्ण बिहारमे उच्च सुरक्षा अलर्ट जारी कयल गेल अछि। एहतियातक रूपमे पर्यटन स्थलक आसपास सुरक्षा बढ़ा देल गेल अछि। कश्मीरमे भेल आतंकवादी हमलाक बाद प्रधानमंत्री नरेन्द्र मोदीक बृहस्पतिकेँ निर्धारित बिहार दौरासँ पहिने संपूर्ण राज्यमे ‘हाई अलर्ट’ घोषित कयल गेल अछि। पुलिस महानिदेशक कहलनि जे बिहार पुलिसक सभ इकाइकेँ अत्यधिक सतर्कता बरतय केर निर्देश देल गेल अछि।

विनय कुमार बुधदिन कहलनि ‘पहलगाममे मंगलदिन भेल आतंकवादी हमलाक बाद संपूर्ण बिहारमे उच्च सुरक्षा अलर्ट जारी कएल गेल अछि।’ पुलिस महानिदेशक कहलनि की एहतियात केर हिसाबसँ राजगीर, बोधगया, पटना आ बहुत ठाम पर महत्वपूर्ण संस्थान सभ आ पर्यटन स्थलक चारू दिसि सुरक्षा बढ़ा देल गेल अछि। ओ कहलनि, ‘ओहि सभ ठाम सुरक्षा बढ़ा देल गेल अछि, जतय पर्यटकक आवाजाही बेसी होइत छै, जेना बोधगयामे महाबोधि मंदिर परिसर, राजगीरमे विश्व शांति स्तूप, पटनामे महावीर मंदिर आ तख्त श्री हरिमंदिर जी।’ कुमार कहलनि की राज्यक सभ हवाई अड्डा पर सुरक्षा बढ़ा देल गेल अछि।
ओ कहलनि कि बिहारक सीमावर्ती जिलासभ आ नेपालसँ सटल इलाकासभमे अलर्ट जारी कएल गेल अछि। कुमार कहलनि, ‘‘सीमावर्ती जिलाक वरिष्ठ पुलिस अधिकारी आ सशस्त्र सीमा बल (एसएसबी) संयुक्त रूपसँ गश्त आ तलाशी अभियान चला रहल अछि। राज्यके नेपालसँ पैघ सीमा लागैत अछि, जकर उपयोग अकसर दोसर देशक घुसपैठी द्वारा भारतीय क्षेत्रमे घुसय लेल कएल जाइत अछि। एसएसबीक अधिकारी सेहो बिहारक सीमावर्ती जिलासभमे अपन चौकीसभ पर कड़ा सतर्कता बरति रहल छथि।

दक्षिण कश्मीरक पहलगाममे मंगलदिन आतंकवादीसभ एकटा प्रमुख पर्यटक स्थल पर हमला कएलक, जाहिमे 28 लोकक मृत्यु भेल। एहिमे सभसँ बेसी पर्यटक छलाह। मृतकसभमे दुटा विदेशी (यूएई आ नेपाल सँ) आ दुटा स्थानीय लोक सेहो शामिल छथि।