जनतब जे एहि हमलामे समाचार सम्प्रेषण धरि 28 पर्यटकक मृत्यु भऽ चुकल अछि, जखनकि दर्जनसँ बेसी लोक घायल छथि।
ख़ुफ़िया सूत्र घटना स्थलसँ बरामद फॉरेंसिक एनालिसिस आ हमलामे बचल लोकसँ प्राप्त जानकारीक आधार पर कहलक अछि जे आतंकवादी सेनाक लेल उपयोग होबऽ वाला हथियारक उपयोग हमला लेल कएलक। एकर मतलब ई अछि कि हमलावर पूर्ण रूपसँ प्रशिक्षित छल आ ओकरा सभकेँ सभ जरूरी हथियार भेटल छल। भारतक एजेंसी सभकेँ घटना स्थलक आस-पास एडवांस श्रेणीक संचार उपकरण भेटल अछि। एहिसँ ई संकेत भेटैत अछि जे आतंकवादीकेँ बाहरसँ लॉजिस्टिक सहयोग आ सहायता प्राप्त होइत रहल अछि। ख़ुफ़िया सूत्र सभक दावा अछि जे हमलावार आतंकवादी पाकिस्तानमे बैसल ऑपरेटिव संग प्रत्यक्ष रूपसँ संपर्कमे छला।
पहलगाम अटैक केर संदिग्धक डिजिटल कनेक्शन पाकिस्तान स्थित मुजफ्फराबाद आ कराचीक सेफ हाउससँ पाओल गेल अछि, जे सीमा पार आतंकवादिक संबंधक साक्ष्यकेँ मजबूत करैत अछि। सुरक्षा अधिकारी पुष्टि कएलन्हि अछि जे हथियारक प्रकृति आ अटैक केर सटीकतासँ पता लगैत अछि जे आतंकवादी सभ प्रशिक्षित संचालक सभसँ सैन्य सहायता लेलक अछि। द रेजिस्टेंस फ्रंट (टीआरएफ) अटैक केर जिम्मेदारी लेलक।
ख़ुफ़िया सूत्रक अनुसार आतंकवादी सम्पूर्ण तैयारीक संग हमला करवा लेल आयल छल। आतंकवादी अपन पीठ पर झोला टांगने छल, जाहिमे सूखा मेवा, दवाई आ संचार उपकरण छल। 5 सँ 6 विदेशी आतंकवादीक एकटा समूह किछु समयसँ जंगलमे नुकायल छल आ स्थानीय लोकक मददिसँ पहलगामक रेकी करैत छल। तैयारी पूरा होयबाक बाद दहशतगर्द मौका देखि हमला कय देलक। गुप्तचर एजेंसीक दावा अछि जे ३ सँ 4 आतंकवादी एके-47 सँ निरंतर गोलीबारी करैत रहल। एहि दौरान 2 पाकिस्तानी आतंकवादी पश्तो भाषा बाजैत छल। ओकरा संग 2 स्थानीय आतंकवादी (आदिल आ आसिफ) सेहो छल। ई दुनू स्थानीय आतंकवादी बिजभेरा आ त्राल केर अछि।
आतंकवादी सभ शरीरमे कैमरा लगा सभ किछु रिकॉर्ड कयने अछि। मानल जा रहल अछि जे पहलगाममे आतंकवादी हमला 26/11 मुम्बई आतंकवादी हमला केर तर्ज पर कयल गेल अछि। एहि आतंकवादी हमलाक उद्देश्य जम्मू-कश्मीरक अर्थव्यवस्था केर निशाना बनेनाइ छल। एहि हमलाक पाछू संभवतः पाकिस्तानी एजेंसी आईएसआई केर हाथ अछि। खुफिया एजेंसी एहि हमलाकेँ अंजाम देनिहार 4 आतंकवादीक एक संग तस्वीर जारी कयलक अछि। एहि तस्वीरमे सभसँ दाहिना दिसि पाकिस्तानी सेनासँ रिटायर आसिफ फौजी सेहो शामिल अछि।
जाँचसँ ताल्लुक राखय वला एकटा वरिष्ठ सुरक्षा अधिकारी कहलनि, “ई मात्र एकटा अलग-थलग आतंकी घटना नहि अछि। हमलावर सभकेँ सीमा पारसँ निर्देशित, सुसज्जित कएल गेल आ ओकरा सपोर्ट देल गेल। ओकर उद्देश्य क्षेत्रकेँ अस्थिर करब आ शांतिकेँ पटरीसँ उतारब अछि।” गृह मंत्रालय स्थिति पर कड़ा नजरि रखि रहल अछि आ संवेदनशील क्षेत्र सभमे अतिरिक्त सुरक्षाबलक तैनाती कएल गेल अछि। वरिष्ठ खुफिया आ सैन्य अधिकारी सभक अध्यक्षतामे एहि सप्ताहक अंतमे एकटा उच्च-स्तरीय समीक्षा बैठक होयबाक आशा अछि।
ई घटना क्षेत्रमे सक्रिय आतंकवादी समूह सभक द्वारा इस्तेमाल कएल जाइत रणनीतिमे बदलावक संकेत दैत अछि। अधिकारी सभ चेतावनी देलनि जे सैन्य-ग्रेड हथियार आ एन्क्रिप्टेड संचार प्रणालीक इस्तेमाल कश्मीरमे हाइब्रिड युद्धकेँ एकटा नव चरण दिसि इशारा करैत अछि। राष्ट्रीय जांच एजेंसी (एनआईए) द्वारा जांचक जिम्मेदारी सम्भाललाक बाद हमलाक योजना बनाबय आ ओकरा अंजाम देबयमे शामिल व्यापक नेटवर्कक बारेमे आओर विवरण सामने अएबक संभावना अछि।
जनतब जे पहलगाम हमलाक बाद पाकिस्तानक पहिल प्रतिक्रिया सामने आएल अछि। पाकिस्तान एही घटनासँ मुँह मोड़ैत कहलक जे एही हमलासँ ओकरा कोनो लेना-देना नहि अछि। रिपोर्टक अनुसार, पाकिस्तानक रक्षा मंत्री ख्वाजा आसिफ कहलनि जे पहलगाम आतंकी हमलासँ पाकिस्तान केर कोनो लिंक नहि अछि। हमरा एहिसँ कोनो लेना-देना नहि अछि। हम हर तरहक आतंकवाद केर निंदा करैत छी। ओ कहलनि जे पहलगाम केर घटनासँ हमर कोनो ताल्लुक नहि अछि।
