बिहार चुनावसँ पहिने राजद आठ टा प्रवक्ताक कयलक मनोनीत

पटना समदिया
*

आरजेडी राष्ट्रीय स्तर पर टीमकेँ बढ़बैत आठ प्रवक्ताकेँ मनोनीत कएलक अछि। मानल जा रहल अछि जे बिहार चुनावक मद्देनजर आरजेडी अपन प्रवक्ताक टीमक विस्तार कयलक अछि।

बिहारमे एही साल (2025) केर अंतमे विधानसभा चुनाव प्रस्तावित अछि। एहि चुनावक हेतु सभ राजनीतिक दल अपन-अपन तैयारी शुरू कऽ देलनि अछि। राष्ट्रीय जनता दल (आरजेडी) राष्ट्रीय स्तर पर प्रवक्तागणक टीमक विस्तार कएलक अछि। किछु नव लोकनिकेँ शामिल कएल गेल अछि।

आरजेडी द्वारा सोमकेँ (21 अप्रैल, 2025) राष्ट्रीय स्तर पर टोलीकेँ बढबैत प्रवक्ताक मनोनयन कएल गेल अछि। आरजेडीक राष्ट्रीय मुख्य महासचिव आ बिहारक पूर्व मंत्री अब्दुल बारी सिद्दीकी एहि संबंधमे पत्र जारी कएलनि। ओ लिखलनि कि पार्टीक राष्ट्रीय अध्यक्ष लालू यादवक निर्देशक बाद आरजेडी आठटा नव राष्ट्रीय प्रवक्ताक मनोनयन कएलक अछि।

आरजेडी जे नव प्रवक्तासभकेँ नियुक्ति कएलक अछि ताहिमेँ दिल्ली विश्वविद्यालयक प्रोफेसर डॉ. श्याम कुमार, डॉ. राजकुमार राजन, डॉ. रविशंकर रवि, जामिया मिलिया इस्लामिया विश्वविद्यालय दिल्लीक प्रोफेसर डॉ. बादशाह आलम, पटना विश्वविद्यालयक प्रो. उत्पल बल्लभ, बीआरए विश्वविद्यालय, मुजफ्फरपुर केर प्रोफेसर डॉ. राकेश रंजन, मगध विश्वविद्यालयक प्रोफेसर डॉ. अनुज कुमार तरुण एवं जेपी विश्वविद्यालयक प्रोफेसर डॉ. दिनेश पाल शामिल छथि। मानल जा रहल अछि जे बिहार चुनावक मद्देनजर आरजेडी अपन प्रवक्तासभक टोलीकेँ बढ़ौलक अछि।

आरजेडीक बिहार प्रदेश प्रवक्ता चितरंजन गगन पार्टीक नवनियुक्त राष्ट्रीय प्रवक्ता सभकेँ बधाई देलनि। आरजेडी प्रवक्ता चितरंजन गगन कहलनि कि बिहार विधानसभामे नेता प्रतिपक्ष तेजस्वी यादवक दूरदर्शी सोच आ सकारात्मक पहल पर राष्ट्रीय अध्यक्ष लालू यादव द्वारा राष्ट्रीय प्रवक्ताक सूचीक विस्तार करैत आठटा नव राष्ट्रीय प्रवक्ताक मनोनयन कयल गेल अछि। ओ आशा व्यक्त करैत कहलथि कि आरजेडीक नवनियुक्त प्रवक्ता पार्टीक नीति आ सिद्धांतकें लोग तक पहुँचाबयमे आ पार्टीकेँ नव ऊँचाइ पर लय जाएमे अपन भूमिका निभेताह।