झारखण्डमे सुरक्षा बलसभक द्वारा आठ नक्सलीकेँ मारि देलाक बाद केंद्रीय गृह मंत्री अमित शाह सोमदिन कहलनि जे नक्सलवादकेँ समाप्त करबा लेल हुनक सरकारक प्रतिबद्धता बरकरार अछि।
जनतब जे झारखण्डक बोकारो जिलामे सीआरपीएफ आ पुलिसक कोबरा कमांडो केर संयुक्त अभियानमे नक्सली संग भेल मुठभेड़मे आठ नक्सली मारल गेल, जाहिमे एक करोड़ टकाक ईनामी नक्सली सेहो शामिल अछि।
केन्द्रीय गृह मंत्री सोशल मीडिया एक्स पर लिखलनि – ‘नक्सलवादकेँ समाप्त करबाक लेल हमर अभियान निरन्तर जारी अछि। आई सुरक्षा बलसभकेँ नक्सलवादकेँ जड़िसँ उखाड़यमे चलि रहल अभियानमे एकटा आर महत्वपूर्ण सफलता भेटल। झारखंडक बोकारोमे लुगु हिल्समे मुठभेड़मे आठ माओवादीकेँ ढेर कएल गेल, जाहिमे एकटा शीर्ष स्तरक नक्सली नेता विवेक, जकरा पर एक करोड़ रुपयाक इनाम अछि आ दू अन्य कुख्यात नक्सली शामिल छल। अभियान जारी अछि। हमर सुरक्षा बलसभके सराहना करू।’
सुरक्षा बलक एही कार्यवाहीक जानकारी दैत अधिकारी कहलनि जे 209 कमांडो बटालियन फॉर रेजोल्यूट एक्शन (कोबरा) केर जवान सभ राज्य पुलिस संग मिलि कऽ अभियान चलौलक, जाहिमे आठ नक्सली मारल गेल आ एकटा एके सीरीज राइफल, तीनटा इंसास राइफल, एकटा सेल्फ लोडिंग राइफल (एसएलआर), आठटा देशी बंदूक आ एकटा पिस्तौल जब्त कएल गेल।
मारल गेल नक्सलीमे उग्रवादी संगठनक केंद्रीय समिति सदस्य प्रयाग मांझी उर्फ विवेक, विशेष क्षेत्र समिति सदस्य अरविंद यादव उर्फ अविनाश, जोनल समिति सदस्य साहेबराम मांझी उर्फ राहुल मांझी, महेश मांझी उर्फ मोटा, तालु, रंजू मांझी, गंगाराम आ महेश शामिल अछि।
