पश्चिम बंगालक राज्यपाल सी.वी. आनंद बोस शुक्रुदिन मुर्शिदाबाद आ मालदामे हिंसा प्रभावित परिवार सभसँ भेंट करबाक लेल पहुँचलाह। ओ कहलनि कि हुनकर उद्देश्य समाजमे शांति स्थापित करब अछि।
मालदा दौरा पर मीडियासँ बात करैत राज्यपाल कहलनि, “हिंसा प्रभावित क्षेत्रमे स्थितिकेँ शीघ्र सामान्य बनेबाक चाही आ समाजमे शांति स्थापित करबाक चाही। हम एहि शिविरमें रहि रहल लोक सभक शिकायत सुनब, हुनकर भावना, संवेदना आ जरूरत बुझब। तकर बाद प्राथमिकताक आधार पर कार्यवाही करब आ शीघ्रतासँ हुनकर शिकायत सभक निवारण करब। हम पहिने शिविरमे रहि रहल लोक सभक अनुभव साझा करब, तकरा बाद किछु प्रतिक्रिया देब।
मुर्शिदाबादक हिंसाक दौरान बेघर भेल पीड़ित परिवार सभसँ शुक्रुदिन पश्चिम बंगालक राज्यपाल सी.वी. आनंद बोस मुलाकात कयलनि। ओ पीड़ित परिवार सभक आपबीती सुनलनि। मुलाकातक बाद राज्यपाल मीडियासँ कहलनि, “मुर्शिदाबादक पीड़ित खास कय महिला हमरासँ भेंट कयलनि। अपन संघर्षक कहानी सुनौलनि, जे बहुत दुखद छल। हम स्वयं स्थितिक जायजा लेबाक लेल ओतय जायब। एकर बादे हम भविष्यक कार्यवाही पर निर्णय लय सकब। हमर दृष्टिकोण पूरा तरहसँ निष्पक्ष होयत। आब केंद्रीय बलक मौजूदगीसँ स्थिति नियंत्रणमे अछि।
जनतब जे वक्फ कानूनमे संशोधनक विरोधमे राज्यक कतेको जिलामे हिंसक प्रदर्शन भऽ चुकल अछि। राज्य पुलिसक एकटा वरिष्ठ अधिकारी कहलनि जे मुर्शिदाबाद जिलामे भेल हिंसा मामिलामे एखनि धरि 200 सँ बेसी गिरफ्तारी भऽ चुकल अछि।
