बिहारमे महागठबंधनक बनल कोऑर्डिनेशन कमेटी, तेजस्वी करताह नेतृत्व – कृष्णा अल्लावरू

पटना समदिया
*

नेता प्रतिपक्ष तेजस्वी यादव चुनावक रणनीतिसभक बारेमे बतौलन्हि। एहिमे इंडिया गठबंधनक तमाम दलसभ अपन बात रखलक। बिहार चुनावक लेल महागठबंधनक बृहस्पतिकेँ एकटा महत्वपूर्ण बैसार भेल। ई बैसार लगभग तीन घंटा धरि चलल, जाहिमे सभ घटक दलक नेता शामिल भेलथि। मंथनक बाद एकटा संयुक्त प्रेस कॉन्फ्रेंस भेल, जाहिमे कृष्णा अल्लावरू आ नेता प्रतिपक्ष तेजस्वी यादव चुनावक रणनीतिसभक बारेमे विस्तारसँ बतएलन्हि। एहिमे इंडिया गठबंधनक तमाम दलसभ अपन-अपन बात रखलनि। तेजस्वी यादव कहलन्हि जे प्रत्येक मुद्दा पर मजबूतीक संग लोकसभक बीच जाएब आ जनताक सरकार बनाएब।

कांग्रेस बिहार प्रभारी कृष्णा अल्लावरु कहलनि जे “जनताक बीच जनताक आवाज बनि मोदी जी, अमित शाह आ मुख्यमंत्री नीतीश’सँ सवाल करब। कैंपेनक की रणनीति होयत, कॉमन मिनिमम प्रोग्राम की होयत, घोषणा पत्र कंबाइंड केना बनत, जिलास्तर आ प्रखंड स्तर पर कोआर्डिनेशन केना होयत, वोटर्स लिस्टमे धांधली कोना रुकत। एकर रूपरेखा आ मजबूतीसँ इंप्लीमेंट करब। कोआर्डिनेशन कमेटी बनल अछि, जकर नेतृत्व तेजस्वीजी करताह। हम जनताक बीच जाएब।”

बेर-बेर पत्रकार सभक सवाल पर कृष्णा अल्लावरु सीएम फेसक लेल कोनो उत्तर नहि देलनि। हालाँकि ई बात तय अछि जे कोआर्डिनेशन कमेटीक नेतृत्व जखनि तेजस्वीकेँ भेटल अछि, तँ आगू सेहो महागठबंधनक कमान ओ संभालताह, से मानल जा रहल अछि, मुदा संदेह तऽ बनले अछि जे आखिरकार स्पष्टता किएक नहिं?

पशुपति पारसक सवाल पर तेजस्वी यादव कहलनि जे आगूक बैठक होयत, ओहिमे जे तय होयत से बतायब।

महागठबंधनक महत्वपूर्ण हिस्सा वीआईपी प्रमुख मुकेश सहनी सेहो अपन बात रखलनि आ कहलनि कि सबकेँ एहसास अछि कि बिहारमे कोनो काज बिना पैसाक नहि होइत अछि। हम लड़ाई लड़य वाला छी। हमर उद्देश्य होयबाक चाही जे कोना लड़ब। सभ बीस वर्ष पहिलुक बात करैत छथि। एनडीए केर लोक सभ तरह-तरहकेँ संदेश द’ रहल छथि। जँ मेडल देबाक होए तँ सभ गलत काज करबाक मेडल बीजेपीकेँ भेटत। हम मजबूतीसँ इंडिया गठबंधनक संग छी। मजबूतीसँ बिहारमे सरकार बनायब।