राष्ट्रीय जनता दल नेता तेजस्वी यादव हरियाणाक मुख्यमंत्री नायब सैनी द्वारा सम्राटक नेतृत्वमे सरकार बनेबाक वक्तव्य पर भारतीय जनता पार्टी (भाजपा)क आलोचना कयलनि। तेजस्वी यादव दावा कयलनि जे मुख्यमंत्री नीतीश कुमारकेँ भाजपा अपहरण कऽ लेने अछि। मुख्यमंत्री अचेत अवस्थामे छथि। राजद नेता तेजस्वी यादव कहलनि, “भाजपा केर मुख्यमंत्री नहि बनत? हमरा ई कहू अहां हुनका (एनडीए नेता) बीच दरार किएक पैदा कए रहल छी ? २ दिनक बाद दोसर नाम (मुख्यमंत्रीक लेल) सामने आबि जायत। ओ सभ आपसमे लड़ैत रहताह। बिहारक जनता राज्यमे महागठबंधन-राजद सरकार आनय जा रहल अछि।
तेजस्वी कहलनि जे एनडीएक खटारा गाड़ी पर बिहारक लोक सवार नै होय बला अछि। आरजेडी गठबंधनक सरकार बनय बला अछि। ओ कहलनि जे बिहारक लोक युवा नेतृत्वकेँ चुनत। आरजेडी नेता बीजेपीक आलोचना करैत कहलनि जे लोक अंबेडकरक विरोध केलनि, जे गोलवलकर आ गोडसे केर विचारधारा पर चलए बला लोक छथि, जे देशक संविधान के नै मानैत छथि, ओ भाजपा आरएसएस लोक लाजसँ अंबेडकर जयंती मना रहल छथि। जनता दल यूनाइटेड होय, बीजेपी होय वा एनडीएक अन्य पार्टनर होय, ई सब अंबेडकरक विचारधारा केर विपरीत कार्य करय पर तुलल अछि।
तेजस्वी यादव आगा कहलनि जे अहां सब केंद्रीय गृहमंत्री अमित शाहक भाषण सुनने होयब पार्लियामेंटमे। कुन प्रकारसँ बाबा साहब अंबेडकरक विषयमे हुनकर बयान आयल छल। जे दिलक बात छल ओ हुनकर जुबानसँ निकलल। पूर्व डिप्टी सीएम कहलनि जे शेड्यूल 9 मे हमर सभक मांग छल जे महागठबंधनक सरकारक तरफसँ कयल गेल 65 फ़ीसदी आरक्षणकेँ शेड्यूल 9 मे दर्ज कयल जाए मुदा ई बीजेपीक सरकार कोर्टमे जाय गड़बड़ करबाक काज कयलक।
जनतब जे हरियाणाक सीएम नायब सिंह सैनी गुरुग्राममे आयोजीत एकटा कार्यक्रममे रविदिन कहलनि जे बिहार चुनाव सम्राट चौधरीक नेतृत्वमे लड़ल जायत आ चौधरीक नेतृत्वमे जीत सेहो हासिल होयत। जखन सैनी ई बयान द’ रहल छलाह त’ सम्राट चौधरी हुनका संग उपस्थित छलाह। यद्यपि जदयू एकरा संयुक्त रूपसँ चुनावक बात कहय केर अभिप्राय बतौलक अछि आर कोनो एकर माने नहिं। ओ विपक्ष एकरा तोड़ि-मरोड़ि कऽ कहि रहल अछि, से कहलक अछि।
