पश्चिम बंगालक मुर्शिदाबाद जिल्लामे वक्फ (संशोधन) कानूनक खिलाफ चलि रहल विरोध प्रदर्शनमे दू व्यक्तिक मौत भऽ गेल अछि। घटनाक जानकारी दैत पुलिस अधिकारी कहला कि मृतक पिता आ पुत्र हिंसा प्रभावित समसेरगंज क्षेत्रक जाफराबादमे अपन घरमे घायल भेटाल छेलाह। जकरा बाद दुनूकेँ अस्पताल आनल गेल, जतय डॉक्टर लोकनि दुनूकेँ मृत घोषित कऽ देलन्हि।
मृतकक परिजन सभक आरोप अछि कि बदमाश सभ हुनकर घरमे लूटपाटक दौरान दुनू पर चाकूसँ कतेको हमला कयने छल।
ओतहि अधिकारी कहला कि एकटा आर घटनामे समसेरगंज ब्लॉकक धुलियानमे एक अन्य व्यक्तिकेँ गोली लागय केर खबरि सामने आएल अछि। वक्फ कानूनक विरोधक दौरान शुक्र दिन मुर्शिदाबाद जिल्लाक सूती आ समसेरगंज क्षेत्रसँ पैघ पैमाना पर हिंसाक सूचना भेटल अछि।
पश्चिम बंगालक मुर्शिदाबाद जिलामे वक्फ कानूनक विरुद्ध प्रदर्शनक कारण दू दिन हिंसा भड़कल। पहिने ८ अप्रैलकेँ फेर ११ अप्रैलकेँ, जाहिमें पुलिस १०० सँ बेसी लोककेँ गिरफ्तार कयलक अछि।
एहि मामिलामे राज्यक मुख्यमंत्री ममता बनर्जी सभ धर्मके लोकसँ हिंसा नहि करबाक अपील कयलनि अछि। ओ कहलनि जे धर्मक नाम पर हिंसा वा दंगा नहि करू। हर इंसानक जीवन किमती होइत अछि। जखनकि हिंसाक मामिलामे भाजपा नेता आ विधानसभामे नेता प्रतिपक्ष शुभेंदु अधिकारी रेलवेक सम्पत्तिमे तोड़फोड़क जाँच राष्ट्रीय जाँच एजेंसी (एनआईए) सँ कराबैक मांग कयने छथि। शुभेंदु अधिकारी एहि संबंधमे रेलवे मंत्री अश्विनी वैष्णवके पत्र लिखलनि अछि।
