कांग्रेसकेँ पिछलग्गू बनब सहन नहिं भऽ रहल अछि आ ओ अपन पुरना जमीन तलाशय लेल बिहारमे पूरा जोर लगा रहल अछि। रैली निकालि रहल अछि, स्वयं राहुल गांधी समेत एक पर एक शीर्ष नेता सभ लगातार बिहार आबि रहल छथि। अर्थात आब बिहारमे कांग्रेस ककरो पाछा नहिं चलत, बल्कि खुद ड्राइविंग सीट पर बैसि क’ नेतृत्व करत।
कांग्रेस महासचिव सचिन पायलट एकर संकेत द’ देलनि अछि। ओ कहलथि जे बिहारमे युवाक संग धोखा भेल अछि। एतेक वर्षसँ राज्य आ केन्द्रमे ककर सरकार छल ? ओ युवा सभक लेल की केलथि ? कांग्रेस नौजवान सभक संग ठाढ़ अछि।
बिहार पहुँचलाक बाद सचिन पायलट ड्राइविंग सीटक कमान अपन हाथमे ल’ लेलनि। प्रेस कॉन्फ्रेंससँ निकललाक बाद होटल मौर्यक पोटिकोमे सचिन पायलट गाड़ी केर ड्राइवरकेँ हटा क’ खुद ड्राइविंग सीट पर बैसि गेलथि आ हुनकर ठिक बगलमे प्रदेश अध्यक्ष राजेश राम बैसल छलथि। संकेत साफ अछि, बिहारमे आब कांग्रेस ककरो पाछा नहि चलत, बल्कि खुद ड्राइविंग सीट पर बैसि क’ नेतृत्व करत।
पत्रकार सभसँ बातचीत करैत पायलट कहलनि जे ‘पलायन रोको, नौकरी दो’ पदयात्राक समापन अछि। हमसभ मुख्यमंत्री आवासक घेराव करब। राहुल गांधी संकल्प लेलनि अछि जे हम सभ वर्गक संग चलब। खास क’ युवाक संग। बिहारमे युवाक संग धोखा भेल अछि। एतेक सालसँ राज्य आ केन्द्रमे ककरा सरकार रहय। ओ युवाक लेल की कएलनि ? कांग्रेस नौजवानक संग ठाढ़ अछि। सचिन पायलट प्रेस वार्तामे कहलनि जे बिहारमे निश्चित रूपसँ हमर सरकार बनत। चुनावमे बहुमत भेटलाक बाद मुख्यमन्त्रीक चेहरा तय होयत। महागठबंधनमे मजबूतीसँ चुनाव लड़ल जायत। हम बिहारमे नवजवानक लेल जे बीड़ा उठाएल अछि, ओहिकेँ अंतिम पड़ाव धरि ल’ जायब।ओ कहलनि जे बिहारमे सबसँ पैघ मुद्दा पलायन अछि। नौकरीक नाम पर लाठी भेटत, ई बिहारक सच्चाई अछि।
ओ कहलनि जे मुख्यमन्त्रीसँ भेट लेल समय मांगने छी, नहि भेटल अछि। बिहारक लोक बहुत समझदार छथि। ओ सब बुझि गेल छथि जे वोट लेबयकेँ बाद के वादाखिलाफी करैत अछि। बिहारक लोक सभसँ अपील करब जे ओहि पार्टीक संग रहू जे नवयुवक सभक लेल किछु करए चाहैत अछि। कांग्रेस पार्टीक माध्यमसँ हम कहब जे हमर प्राथमिकता नवयुवक छथि आ रहत। बिहारमे हमर सरकार निश्चित रूपसँ बनत।
कन्हैया कुमार कहलथि जे शिक्षा बिना बुद्धिक नाश होइत अछि। शिक्षा सबसँ महत्वपूर्ण अछि। कांग्रेसक यात्रा पटना पहुँचि गेल अछि। एक लाख लोकसँ भेंट भेल अछि। हुनकर समस्या आइ मुख्यमंत्रीक आवास मे जा कऽ हुनका देब। आशा अछि मुख्यमंत्री ओहि सभ समस्याकेँ दूर करताह।
शकील अहमद खान कहलथि जे बिहारमे पलायन एकटा विक्राल रूप लऽ चुकल अछि। एनडीए केर सरकारमे पलायन निरंतर बढ़ि रहल अछि।
