लखीसराय केर बड़हिया नगर परिषद क्षेत्रक वार्ड संख्या 17 मे कॉमरेड हरिवंश रामक आवास पर बृहस्पतिकेँ एकटा महत्वपूर्ण राजनीतिक बैठक केर आयोजन कएल गेल। बैठक भारतीय कम्युनिस्ट पार्टी आ मार्क्सवादी कम्युनिस्ट पार्टी केर संयुक्त आह्वान पर बजाओल गेल छल। जेकर अध्यक्षता वरिष्ठ नेता कॉ. रामचंद्र महतो कयलथि। बैठकमे जनहितक ज्वलंत मुद्दा पर गहन चर्चा कएल गेल।
जिला मंत्री कॉ. हर्षित यादव आ वरिष्ठ तथा संघर्षशील नेता कॉ. महेश्वरी प्रसाद सिंह बैठक केर संबोधित करैत कहलथि जे बिहारक भूमि पर आजुक समयमे किसानक आत्महत्या आ युवा बेरोजगारी आम बात बनि गेल अछि। प्रत्येक घंटा एकटा नव पीड़ा जन्म लैत अछि, मुदा सत्ताक कुर्सी पर बैसल लोकसभ एहि आहकेँ सुनबाक लेल तैयार नहि छथि।
ओ कहलनि कि बिहारमे हिंसा, भ्रष्टाचार आ लचर स्वास्थ्य व्यवस्था आम जनक जीवनकेँ संकटग्रस्त बना देने अछि। एहि हालातकेँ ध्यानमे रखैत पार्टी एकजुट भऽ क’ 22 अप्रिलकेँ राज्यव्यापी धरना-प्रदर्शन आयोजन करबाक घोषणा कएलक अछि। जाहिमे घर विहीन परिवार सभकेँ पांच डिसमिल जमीन उपलब्ध करायब, बुजुर्ग नागरिक सभकेँ दू हजार रुपया मासिक पेंशन देबाक गारंटी, बड़हिया रेफरल अस्पतालमे डॉक्टर आ कंपाउंडर केर रिक्त पद पर शीघ्र नियुक्ति, अस्पतालमे आवश्यक चिकित्सकीय संसाधनक व्यवस्था क’ स्वास्थ्य सेवा बहाल करब, किसान सभकेँ उपजक उचित मूल्य आ राहत पैकेज उपलब्ध करायब आदि मांग सभ शामिल अछि।
बैठकमे वक्तासभ कहलनि जे ई आंदोलन खाली एकटा राजनीतिक विरोध नहि, बल्कि जनता केर आवाज थिक। ओ सब आम जनतासँ आह्वान कएलनि जे ओ सभ पैघ संख्यामे 22 अप्रिलकेँ धरना-प्रदर्शनमे भाग लऽ सरकारकेँ ई बात बुझा दैथ जे आब चुप्पी नहि, संघर्ष होयत।
मौका पर महेंद्र मांझी, भोला ठाकुर, द्वारिका बिंद, श्रीकांत सिंह, महेश्वरी सिंह, हरिवंश राम समेत दर्जन भर वामपंथी कार्यकर्ता आ समर्थक उपस्थित छलथि। सभ एक स्वरमे आंदोलनकेँ सफल बनेबाक संकल्प कएलनि आ कहलखिन कि जनता केर हक आ हकूकक लड़ाई आब तेज होयत।
