पीएम मोदीकेँ पुतिन विजय दिवस परेडमे शामिल हेबाक देलनि आमंत्रण

नई दिल्ली
*

रूसक सरकार प्रधानमंत्री नरेंद्र मोदीकेँ ९ मईकेँ मास्कोमे आयोजित ८०म विजय दिवस समारोहमे भाग लेबाक लेल औपचारिक रूपसँ आमंत्रित कयलनि। ई समारोह द्वितीय विश्वयुद्धमे नाजी जर्मनी पर सोवियत संघक जीत केर चिन्हित करैत अछि।

मीडिया रिपोर्टक अनुसार रूसक उप विदेश मंत्री आंद्रे रुडेन्को ई बातक पुष्टि कयलनि कि नई दिल्ली लेल आधिकारिक आमंत्रण भेजल गेल अछि आ उच्च स्तरीय यात्राक तैयारी जारी अछि ।

रूसक सरकारी समाचार एजेंसीक हवालासँ मंगलकेँ रुडेन्को कहलनि कि काज जारी छै, हुनका निमंत्रण भेटि गेल छनि।

उप विदेश मंत्री कहला कि रूस मॉस्कोक प्रतिष्ठित रेड स्क्वायर पर आयोजित वार्षिक सैन्य परेडमे शामिल हेबाक लेल कतेको मित्र देशक नेताकेँ एही तरह आमंत्रण देलक अछि।

यद्यपि भारत सरकारक सूत्र कहलनि जे, 9 मईकेँ विजय दिवस परेडमे रक्षा मंत्री राजनाथ सिंह भारतक प्रतिनिधित्व करताह। एकर मतलब अछि जे प्रधानमंत्री मोदीकेँ व्यक्तिगत रूपसँ उपस्थित हेबाक संभावना कम अछि।

पिछला महीना मॉस्को एहि बातक पुष्टि करलक कि रूसक राष्ट्रपति व्लादिमीर पुतिन एहि सालक अंतमे भारतक दौरा करताह। फरवरी २०२२ मे रूस यूक्रेन पर पूर्ण पैमाना पर हमला कयलाक बाद ई हुनक पहिल भारत यात्रा होयत ।
हालांकि पुतिनक यात्राक तारीख एखनि तय नहिं भs सकल छै, मुदा दुनु नेता द्विपक्षीय बैठक आ नियमित टेलीफोन बातचीतक माध्यमसँ नियमित कूटनीतिक संपर्क कायम रखने छथि।

प्रधानमंत्री मोदी अंतिम बेर जुलाई २०२४ मे रूसक दौरा कयने छलाह, जे लगभग ५ सालमे हुनक पहिल देश यात्रा छल। एहिसँ पहिने ओ 2019 मे आर्थिक सम्मेलनमे भाग लेबा लेल व्लादिवोस्तोक गेल छलाह।

२०२४ केर यात्राक दौरान पीएम मोदी राष्ट्रपति पुतिनक संग व्यापक बातचीत कयलाह आ रूसी नेताकेँ भारतक दौरा करय लेल आमंत्रित कयलनि जेकरा क्रेमलिन स्वीकार कयलनि।

विजय दिवस परेड, जे हर साल 9 मई केँ होइत अछि। ई रूसक सबसँ महत्वपूर्ण राजकीय उत्सवमे सँ एक अछि, जे द्वितीय विश्वयुद्धमे नाजी जर्मनी पर सोवियत सेनाक जीतक यादमे मनाबैत अछि। एहि बेरक एहि आयोजनक खास महत्व अछि किएक तऽ ई यूरोपमे युद्ध समाप्त होबए केर 80म वर्षगांठ अछि।