बिहारमे जेना प्रशासने आ पुलिसकर्मी सभ असहाय भऽ गेल होय तहिना लागि रहल अछि। मुजफ्फरपुरमे भीड़ पुलिसकर्मी सभकेँ दौड़ा-दौड़ा कऽ पीटलक, रिवर्स गाड़ी भगाकऽ दारोगा अपन जान बचेलनि।
मिथिला क्षेत्रीय बिहारक मुजफ्फरपुरमे पुलिस दल पर भीड़ हमला कऽ देलक। दारोगा भागिकऽ भीड़सँ अपन जान बचौलनि। पुलिस बहुतो लोक केर खिलाफ मामिला सेहो दर्ज कएलक अछि। मुजफ्फरपुरमे पुलिस पर हमला केर घटना सभ खत्म होयबाक नाम नै लऽ रहल अछि। एक बेर फेर पुलिस पर हमला भेल अछि।
ताजा मामिला जिलाक बोचहां थाना क्षेत्रक मझौलीक अछि। जतऽ महिला वकील सोनी कुमारसँ मारपीट केर सूचना पर पहुँचल पुलिस पर भीड़ हमला कऽ देलक। लोक पुलिस पर छतसँ पाथर फेंकऽ लगल। मझौली गाँवमे लाठी-डंडा लेने लोक पुलिसकर्मी सभकेँ दौड़ा-दौड़ाकऽ पीटलक। दारोगा समेत बहुतो पुलिसकर्मी अपन जान बचेबाक लेल तीन किलोमीटर तक गाड़ी बैक कऽ भाग’ पड़ल।
भीड़क हमलामे एक सैप जवान समेत 4 लोक घायल भेल। एहि दौरान सैप जवानक राइफल सेहो छिनबाक कोशिश कएल गेल। छीना झपटीमे राइफलक अपर गार्ड टूटि गेल आ ई भीड़क हाथ लगि गेल। भीड़मे महिलासभ सेहो शामिल छल।
भीड़ पुलिस पर हावी छल। पुलिसक अनुसार, भीड़मे पैघ संख्यामे महिला सभ छल। पुलिस वाहनकेँ घुमा नहि सकल आ मझोलीसँ थाना धरि लगभग तीन किलोमीटर धरि रिवर्स गियरमे गाड़ी चलाबय पड़ल। पुलिस एफआईआर दर्ज कऽ हमलावर सभकेँ पकड़बाक लेल तलाश शुरू कऽ देलक अछि। पुलिस दूटा नाबालिग सहित तीनटा आरोपीकेँ गिरफ्तार कऽ लेलक अछि।
कहल जा रहल अछि जे महिला वकीलकेँ पीटय आ मोबाइल छीनबाक शिकायत पर पुलिस मझौली गेल छल। हमलावरमे महिला सभ सेहो शामिल छलीह। एसएसपी सुशील कुमार कहलनि जे पुलिसकेँ दुनू पक्षक बीच झगड़ाक सूचना भेटल छल। जखनि पुलिस घटनास्थल पर पहुँचल तखनि ओ छतसँ पाथर फेकय लागल, जाहिमे एसएपीक जवान घायल भऽ गेल। घायल पुलिसकर्मीकेँ इलाजक लेल अस्पतालमे भर्ती कराओल गेल छल। पुलिस प्राथमिकी दर्ज कऽ तत्काल कारवाई कयलक अछि आ हमलाक लेल तीनटा अभियुक्तकेँ हिरासतमे लेने अछि। पुलिस कहलक जे ओ हमलावर सभक पहिचान करबाक प्रयास कऽ रहल अछि। जल्दिये सभ आरोपीकेँ गिरफ्तार कए लेल जाएत। घायल पुलिसकर्मीक हालत खतरासँ बाहर अछि।
