दुबई केर क्राउन प्रिंस शेख हमदान बिन मोहम्मद अल मकतूम आइ मंगलसँ दू दिनक भारत यात्रा पर आबि रहल छथि। भारतमे ई हुनकर पहिल आधिकारिक दौरा होयत। ई जानकारी विदेश मंत्रालय सोमकेँ देलक।
प्रिंस हमदान मात्र दुबई केर युवराज नहि छथि, बल्कि ओ यूएई केर उप प्रधानमंत्री आ रक्षा मंत्री सेहो छथि। हुनकर संगे कतेको मंत्री, वरिष्ठ अधिकारी आ एकटा बड़का व्यापारिक प्रतिनिधिमंडल सेहो भारत आबि रहल अछि।
प्रधानमंत्री नरेंद्र मोदीक संग मंगलकेँ शेख हमदानक सम्मानमे एकटा विशेष लंच आयोजित अछि। ताहि केर अलावा, क्राउन प्रिंसकेँ विदेश मंत्री एस. जयशंकर आ रक्षा मंत्री राजनाथ सिंहसँ सेहो भेंट होयत।
प्रिंस दिल्ली केर बाद मुंबई सेहो जयताह, जतय ओ भारत आ यूएई केर प्रमुख व्यापारिक नेता सभक संग एकटा व्यापारिक बैसारमे भाग लेताह। एहि बैसारक उद्देश्य भारत आ दुबई केर बीच व्यापारिक संबंध विशेष रूपसँ पारंपरिक आ भविष्य केर तकनीकसँ जुड़ल क्षेत्र सभक विशेष मजबूत करब अछि।
ओतहि विदेश मंत्रालय कहलक जे दुबई श भारतक संग व्यापार, संस्कृति आ लोकक आपसी संबंध सभमे महत्वपूर्ण योगदान देलक अछि। यूएईमे रहनिहार करीब 43 लाख भारतीय सभमे सँ बहुत हिस्सा दुबईमे रहैत अछि आ काज सेहो करैत अछि। ध्यान देबय योग्य अछि जे विदेश मंत्री जयशंकर एहि वर्ष 27-29 जनवरीकेँ यूएई यात्रा केर दौरान क्राउन प्रिंसकेँ भारत आबय केर निमंत्रण देने छलथि। ओहि मुलाकातकेँ सेहो दूनू देशक बीच मित्रताकेँ आर मजबूत करबाक लेल कहल गेल छल।
