संसदीय कार्य मंत्री किरन रिजिजू बुधकेँ लोकसभामे वक्फ (संशोधन) विधेयक पेश कयलथि। कांग्रेसक दिग्गज नेता राशिद अल्वी बुधकेँ मिडियासँ बातचीत करैत दावा कयलनि जे हमार सरकार बनिते वक्फ कानूनकेँ रद्द कऽ देब।
राशिद अल्वी कहलथि, “लोकसभामे हम मंत्रीक भाषण सुनलहुँ। ओ सभ पूरा देशकेँ गुमराह करबाक काज कएलनि अछि। आजुक दिन भारतक इतिहासमे कारी दिन मानल जायत। भाजपा आ आरएसएस द्वारा मिलि कऽ जाहि दिन बाबरी मस्जिद ढहाओल गेल, ओहो कारी दिन छल। एक बेर फेर भाजपाक सरकार मुस्लिम दुश्मनी पर आमादा अछि। इतिहासमे ई सरकार मुस्लिम दुश्मनी पर आमादा सरकार कहलायत। एनडीए मे शामिल नीतीश कुमार आ चंद्रबाबू नायडू जँ एहि बिलक संग रहैत छथि, त’ ओहो मुस्लिम दुश्मनीमे भाजपा संग ठाढ़ कहेताह।
“वक्फ संशोधन बिलसँ मुसलमानकेँ कोनो नुकसान नहि होयबाला सरकारक दावापर राशिद अल्वी पुछलथि, “की मंदिरक कम्युनिटीमे मुसलमान शामिल होयत ?
ऐहन एकटा कानून बनाउ जाहिमे मंदिरक कम्युनिटीमे मुस्लिम सेहो शामिल होय आ मुस्लिमक कम्युनिटीमे हिन्दू सेहो शामिल होय। ओ आरोप लगौलनि, “वक्फक भीतर भाजपा आ आरएसएसक लोक शामिल होयत आ वक्फक सम्पत्तिकेँ हड़पबाक काज करत।”
राशिद अल्वी दावा कयलथि, “कानून पारित भए गेलाक बाद प्रदर्शन करबाक कोनो अर्थ नहि रहि जायत। भाजपा चाहैत अछि जे मुसलमान प्रदर्शन करथि आ सड़क पर उतरत। ओ सभ देशमे शाहीन बाग जेकाँ हालात बनाबए चाहैत छथि, जाहिसँ हुनका शक्ति भेटत। भाजपा केर सरकार जखनि धरि रहत, ओ प्रदर्शन करनिहार केर बात नहि सुनत। 2029 मे हमर सरकार आएत आ हम एहि कानूनकेँ रद्द कय देब।”
सरकारक कांग्रेस पर मुसलमानसभ केँ गुमराह करबाक आरोप पर अल्वी कहला, “जँ कांग्रेस गुमराह कऽ रहल अछि त’ की टीएमसी, डीएमके आ सपा सहित बहुत रास पार्टीसभ सेहो गुमराह क रहल अछि ? की वक्फ बिलक विरोध करयवाली सभ पार्टीसभ भटका रहल अछि ? कांग्रेस पर आरोप लगाबय केर भाजपा केर आदत भ’ गेल अछि। किछु वर्षक मामिला अछि, कांग्रेसक सरकार आबिते ‘वक्फ संशोधन बिल’केँ हम पलटि देब।
