बांग्लादेशक अंतरिम सरकारक मुख्य सलाहकार मोहम्मद यूनुस अपन चीन यात्रासँ पहिने राजधानी ढाकामे एकटा विशेष साक्षात्कारमे कहलनि, “हम चीनकेँ एकटा नीक मित्र मानैत छी। पछिला किछु वर्षमे बांग्लादेश आ चीनक बीच संबंध अत्यन्त मजबूत भेल अछि। आर्थिक आ व्यापारिक क्षेत्रमे सहयोग काफी नजदीकी रहल अछि। एहि सहयोगसँ हमरा सभकेँ काफी लाभ भेल अछि। हम दुनू देशक सम्बन्धकेँ एकटा नव चरणमे ल’ जएबाक आशा रखैत छी।
यूनुस कहलनि जे अंतरिम सरकारक मुख्य उद्देश्य बांग्लादेशक पुनर्निर्माणकेँ आगू बढ़ेनाइ अछि। ओ चीनक विकास संबंधी उपलब्धिक प्रशंसा करैत कहलनि ई बांग्लादेशक लेल प्रेरणादायक अछि। ओ ईहो कहलनि जे बहुतो बांग्लादेशी एही बात पर विचार क’ रहल अछि जे चीनक विकास मडलकेँ अपन देशमे कतेक लागू कएल जा सकैत अछि। ओ कहलनि, “हम चीनक अनुभवसँ सीखब आ एकरा बांग्लादेशक विकासमे समाहित करबाक तरिका पर विचार करब।”
गरीबी उन्मूलनक संदर्भमे यूनुस चीनक नीतिसभक प्रशंसा कयलनि आ कहलनि जे बहुतो देश केवल जीडीपी वृद्धिक पर ध्यान दैत अछि, जखनि कि आम जनता केर आवश्यकताकेँ नजरअंदाज कएल जाइत अछि। एकर विपरीत, चीन निम्न आय वर्गक लोकक कल्याणकेँ प्राथमिकता देलक आ गरीबी उन्मूलनमे उल्लेखनीय सफलता प्राप्त कएलक। ओ कहलनि जे हालक वर्षसभमे चीन आ बांग्लादेशक बीच व्यापारिक सहयोग उच्च गति पकड़लक अछि। चीन बीतल 15 वर्षसँ बांग्लादेशक सभसँ पैघ व्यापारिक साझेदार बनल रहल अछि। वर्तमानमे बांग्लादेशमे लगभग एक हजार चीनी कंपनी सभ सक्रिय अछि, जाहिसँ 5.5 लाखसँ बेसी नौकरी उत्पन्न भ’ चुकल अछि।
भविष्य केँ ल’ कऽ आशावादी दृष्टिकोण अपनबैत यूनुस कहलनि कि दुनू देशक बीच आर्थिक सहयोगक अपार संभावना अछि। ओ कहलनि, “हम चीनकेँ निवेश लेल व्यापार शुरू करबा लेल आ संयुक्त रूपसँ एकटा व्यापक बाजार खोलबाक लेल आमंत्रित करैत छी।”
