बिहार विधानसभाक बजट सत्र गरमायल अछि। एहि बेर विधानसभामे नीतीश कुमार आ राबड़ी देवीक बीच तीक्षण बहस देखल गेल अछि। बादमे एक्सक माध्यमसँ राबड़ी देवीक बेटी रोहिणी आचार्य सेहो पलटवार कएलनि।
रोहिणी भोजपुरीमे ट्वीट करैत नीतीश कुमार पर करारा हमला कएलनि आ लिखलनि जे “ओ (नीतीश) ओकर समर्थनमे ठाढ़ छथि, जे पहिने हुनकर डीएनएमे खोट बतौने छल।”
बिहार विधानसभा केर बजट सत्र एहि समय राजनीतिक उठापटक केर केंद्र बनल अछि। मंगलकेँ सदनमे विपक्षक सदस्य आरक्षणकेँ 9वीं अनुसूचीमे समावेश करबाक मांग क रहल छल। पूर्व मुख्यमंत्री राबड़ी देवी एहि विरोधक नेतृत्व क रहल छलीह। एहि क्रममे मुख्यमंत्री नीतीश कुमार राबड़ी देवीकेँ संबोधित करैत कहलनि जे राबड़ी केर कोनो योगदान नहि अछि आ जे ओ कयलथि, से हुनक पति केर कारण भेल। नीतीश कुमार एतय धरि कहि देलनि, तू बस बैस जा, जे छह से तोहर हस्बैंडक छह, तोहर की छह। ई बेचारीकेँ किछु नहि अबैत अछि। पति रिजेक्ट भेल, त’ एकरा सीएम बना देल गेल छल।
नीतीश कुमारक एहि बयानक बाद राबड़ी देवीक बेटी रोहिणी आचार्य ट्वीट करैत नीतीश कुमारकेँ निशाना पर लेलनि। रोहिणी नीतीशसँ भोजपुरीमे तंज करैत कहलीह, ‘अरे तू चुप्प रहअ, जादा मुँह मत फाड़अ, तोहरा त’ बाजैकेँ मुँह नय छह, तू ओकरे गोदीमे जा बईठलअ, जे तोहर डीएनएमे खोट बतेलकह, तु त’ सही हस्बेंडो नहि बनि सकलह। एही ट्वीटमे रोहिणी नीतीशकेँ कुर्सी पर बैठबाक तरिका आ हुनकर पार्टीक नेतृत्व पर सेहो निशाना साधलनि। हुनका कहैत सुनल गेल जे नीतीश कुमार जुगाड़सँ कुर्सी पाओलाह आ ओ एक ‘तीन नंबर’क नेता छथि।
एहि बीच नीतीश कुमार विपक्ष पर कड़ा प्रतिक्रिया व्यक्त कयलनि आ प्रदर्शन करनिहारकेँ फालतू कहलनि।नीतीश कुमार कहलनि जे जखनि हुनकर पतिक सरकार छल, तखनि बिहारमे किछु नहि भेल। ओ ई सेहो कहलनि जे जखनि हुनकर सरकार छल, तखनि कुनू मामिलाकेँ ठीकसँ जांच नहि कएल गेल।
ई राजनीतिक एकटा हिस्सा अछि जतय बयानबाजीक सिलसिला लगातार जारी रहैत अछि। नीतीश कुमार आ राबड़ी देवीक बीच पहिने सेहो बहस भ’ चुकल अछि आ शायद ई जंग आब आर तेज होयत। रोहिणी आचार्यक प्रतिक्रिया ई देखाबैत अछि जे एहि मामिलामे लालू परिवार पाछू हटई वाला नहि अछि।
