महाराष्ट्रक नागपुरमे हिंसाक बाद मुख्यमंत्री देवेंद्र फडणवीस शनिकेँ एकटा प्रेस कॉन्फ्रेंस कऽ कऽ बड़का ऐलान केलथि। ओ स्पष्ट कयलनि जे दंगामे भेल नुकसानक भरपाई दंगाइसँ वसूल कएल जायत आ जँ ओ भुगतान नहि करैत अछि, तँ हुनकर संपत्ति जब्त कऽ बेचि देल जायत। सीएम फडणवीस बतौलनि जे दंगामे शामिल 104 लोककेँ पकड़ल गेल अछि, जाहिमे सँ 92 केँ गिरफ्तार कएल गेल अछि, जखनकि शेष नाबालिग अछि।
दंगाइक पहचान सीसीटीवी फुटेज आ वीडियो रिकॉर्डिंगक माध्यमसँ कएल जा रहल अछि आ अंतिम आरोपीक गिरफ्तारी तक कारवाई जारी रहत।
ओ कहलनि जे हिंसा औरंगजेबक प्रतीकात्मक कब्र जरेलाक बाद पसरल। ओकर बाद सोशल मीडिया पर अफवाह पसारल गेल जे एकटा चादर जराओल गेल छल, जकरा पर कुरानक आयत लिखल छल, मुदा ई सम्पूर्ण झूठ छल। ओ ऐलान कयलनि जे सोशल मीडिया पर अफवाह पसारयवालाकेँ सेहो आरोपी बनाओल जायत। संगहि बांग्लादेशी कनेक्शनक जांच सेहो कएल जायत, हालाँकि एहि पर अहि समय किछु कहनाई जल्दबाजी होएत।
मुख्यमंत्री उत्तर प्रदेशक तर्ज पर दंगाइ पर कारवाई करबाक बात कहलथि। ओ स्पष्ट कएलथि, “जतऽ बुलडोजर चलेबक आवश्यकता होएत, ततय बुलडोजर चलत।” मालेगांवमे एमडीपी केर कार्यालय खुलबाक आ ओकर फंडिंगसँ जुड़ल सेहो जाँच हुअत। ओ कहलथि जे एकर जानकारी जगजाहिर अछि, मुदा आब एकर आर्थिक स्रोत सभक गहन जाँच होयत।
ओ कहलथि जे नागपुरमे भेल हिंसाक प्रधानमंत्री नरेंद्र मोदी केर दौरा पर कोनो असर नहिं पड़त। शहरक 80 प्रतिशत इलाका हिंसासँ प्रभावित नहि अछि आ जतऽ दंगा भेल छल, ओतऽ सेहो आब शांति अछि। से पीएम मोदीक दौरा निश्चित कार्यक्रम अनुसार होयत।एकर संग संग सीएम फडणवीस आश्वासन देलथि जे जतऽ दंगामे जिनकर गाड़ीक आ संपत्तिक क्षति भेल अछि, सरकार हुनका मदति करत। आगूक सात दिनमे राहत योजना लागू होयत, मुदा जेहो नुकसान भेल अछि, ओकर वसूली दंगाइसँ होयत। ओ दु टूक कहलथि जे ककरो दंगा भड़काबय केर अधिकार नहि देल जायत। कठोर कारवाई कए ई सुनिश्चित कएल जायत जे भविष्यमे एहेन घटनासभ नहिं दोहराओल जाए।
