नई दिल्ली
*
केंद्रीय गृह मंत्री अमित शाह शुक्रदिन राज्यसभामे कांग्रेस सांसद राहुल गांधीक बिना नाम लेने निशाना साधलनि। गृह विभाग पर भेल चर्चाक जवाब दैत अमित शाह राहुल गांधीक ‘भारत जोड़ो यात्रा’ पर कटाक्ष कयलनि। अमित शाह कांग्रेस सांसद पर तंज करैत कहलनि जे ओ पैदल यात्रा निकाललनि आ अपन कार्यकर्ता संग कश्मीरमे बर्फक होली खेललनि आ कहलनि जे दूरसँ आतंकवादी देखाइत छल।
मुदा, हम तऽ आतंकवादीकेँ देखिते सीधा दुनू आँखिक बीचमे गोली मारैत छी।
गृह मंत्री अमित शाह घाटीक जिक्र करैत कहलनि जे पहिने कश्मीरमे दिन प्रतिदिन पड़ोसी देशसँ आतंकवादी घुसिकए बम धमाका करैत छल। एक्कोटा त्यौहारमे एहेन नहिं होइत छल जे चिंता बगैर बीतैत छल। एहिकेँ बादो केंद्र सरकारक रवैया लचीला रहैत छल, चुप रहैत छल, बाजबामे डर लगैत छल, वोटबैंकक डर सेहो रहैत छल। नरेंद्र मोदी जी केर आगमनक बाद आतंकवादक खिलाफ ‘जीरो टॉलरेंस’ केर नीति अपनाओल गेल। हमरा आगमनक बाद जखन उरी आ पुलवामा पर हमला भेल, तऽ हम 10 दिनमे पाकिस्तानक घरमे घुसिकए सर्जिकल आ एयर स्ट्राइक कय मुंहतोड़ जवाब देलहुँ। पूरा दुनियामे दू देश एहेन छल, जे अपन सीमा आ सेनाक लेल हमेशा तत्पर रहैत छल। इजरायल आ अमेरिका। ई दुनू देशक सूचीमे महान भारतक नाम नरेंद्र मोदी जोड़लन्हि आ एहिसँ आतंकवादक खिलाफ ‘जीरो टॉलरेंस’ केर नीति शुरू भेल।
गृह मंत्री अमित शाह राहुल गांधी पर तंज कसैत कहलनि की हिसाब पूछैत छथि की 370 हटेबाक परिणाम की भेल। साहब, हिसाब त’ हुनका देल जाइत अछि, नजारा त’ हुनका देखाओल जाइत अछि, जिनकर नजर साफ होइछ। जे कारी चश्मा पहिरि, आंखि मूंदि क’ बैसल छथि, हुनका विकास नहि देखाओल जा सकैत अछि। पैदल यात्रा कश्मीर धरि गेल, अपन कार्यकर्ता सभक संग बर्फक होली खेलला आ कहलनि की दूरसँ आतंकवादी देखाइत छल। अरे भाइ, जिनकर नजरिमे आतंकवादी अछि, त’ ओ सपनामे सेहो अयबे करत आ कश्मीरमे सेहो देखायत।
ओ (अमित शाह) कहलनि अहांक (यूपीए) शासनमे जम्मू कश्मीरमे 33 वर्षसँ सिनेमा घर नहि खुजल, हमारा समयमे खुजल। ताजियाक जुलूसकेँ अनुमति नहि छल, हमरा समयमे देल गेल। जी-20 केर समय दुनियाभरिक कूटनीतिज्ञ शांतिसँ जम्मू कश्मीर आयल आ ओहिठामक भोजन, संस्कृति, सुन्दरताक आनंद लेलनि।
अमित शाह कहला जे 10 वर्ष पहिने जम्मू कश्मीरमे आतंकवादीक महिमामंडन होइत छल, जनाजाक जुलूस निकलैत छल। हमारा समयमे सेहो आतंकवादी मारल गेल, बेसी मारल गेल, मुदा केकरो जनाजाक जुलूस नहि निकलल। जे आतंकवादी जतय मारल जाइत अछि, ओतहि दफना देल जाइत अछि। कतेक वर्षसँ कश्मीरक तिजोरी खाली छल। 2015 मे नरेंद्र मोदी 80 हजार करोड़ टाका केर 63 परियोजनाक शुरुआत कयलनि। किछू लोक हमर खर्चक हिसाब पूछि रहल छल। अरे भाई, थोड़े कम भ’ सकैत अछि, हम करबाक हिम्मत त’ कयलहुँ, अहाँक समयमे त’ खर्चक प्रावधाने नहि छल। 80 हजार करोड़मे सँ 51 हजार करोड़ टाका खर्च कएल गेल अछि आ 63 मे सँ 53 परियोजनाक क्रियान्वयन भ’ चुकल अछि।
