मध्य नागपुरक चिटनिस पार्कमे सोमदिन (१७/०३/२०२५) साँझ लगभग ७:३० बजे हिंसा भड़कि गेल, जाहि दौरान पुलिस पर पाथर फेकल गेल आ कतेको लोक घायल भऽ गेलाह। एही घटना पर महाराष्ट्रक मुख्यमंत्री देवेन्द्र फडणवीस मंगलकेँ विधानसभामे वक्तव्य देलनि। ओ कहलनि जे हिंसा एहि अफवाहसँ शुरू भेल जे प्रतीकात्मक कब्र पर राखल चादरमे धार्मिक प्रतीक छल, जकरा जरा देल गेल। साँझमे ई अफवाह पसरि गेल, नमाजक बाद लोकक भीड़ ओहि ठाम आबि नाराबाजी करय लागल आ स्थिति बिगड़ि गेल जकर बाद हिंसा भड़कि उठल।
देवेंद्र फडणवीस कहलनि जे हिंसामे १२टा दुपहिया वाहन क्षतिग्रस्त भेल आ एकटा क्रेन, दूटा जेसीबी आ किछु चारि पहिया वाहनमे आगि लगा देल गेल। घटनास्थल पर लगभग ८० सँ १०० लोक जमा भऽ गेल छल। किछु लोक पर तलवारसँ हमला भेल छल। ओ कहलनि जे स्थिति तखनि आओर गम्भीर भऽ गेल जखनि एकटा पुलिसकर्मी पर कुरहरिसँ हमला कयल गेल। एहि हिंसामे डीसीपी स्तरक तीनटा अधिकारी सहित ३३ पुलिसकर्मी घायल भऽ गेलाह। एकर अतिरिक्त, पाँचटा आम लोककेँ सेहो चोट लागल छल।
मुख्यमंत्री कहलनि जे एहि मामिलामे पाँचटा अपराध दर्ज कयल गेल अछि। कानून आ व्यवस्था बनेने रखबाक लेल ११ थाना क्षेत्रमे लोकक सभा पर रोक लगा देल गेल अछि। एकर अतिरिक्त, स्थितिक प्रबन्धनक लेल राज्य रिजर्व पुलिस बल (एसआरपीएफ)क पाँचटा इकाइ तैनात कयल गेल अछि। ओ उल्लेख कयलनि जे पुलिस तेजीसँ काज कयलक आ स्थितिकेँ नियंत्रणमे अनलक।
फडणवीस जनतासँ शान्ति कायम रखबाक अपील कयलनि आ आश्वासन देलनि जे सरकार एहि मामिलासँ सख्तीसँ निपटत। ओ कहलनि, “जे दोषी अछि ओकरा छोड़ल नहि जायत। पुलिस नीक काज कयलक अछि आ सख्त कार्यवाही जारी रहत। ओ कहलनि “हमरासभकेँ पाथरक एकटा ट्रॉली भेटल, जे पूर्व नियोजित योजनाक संकेत दैत अछि आ किछु विशेष घर आ संस्थानकेँ निशाना बनाओल गेल। पुलिस पर हमला बर्दाश्त नहि कएल जाएत।
भाजपा विधायक सुधीर मुनगंटीवार मीडियासँ बातचीतमे कहलनि जे नागपुरक घटना दुर्भाग्यपूर्ण अछि। जे लोक शांतिपूर्ण आन्दोलनकेँ बाधित करबाक प्रयास कऽ रहल छथि हुनका विरुद्ध सरकारकेँ कठोर कार्यवाही करबाक चाही। एहेन व्यक्तिक विरुद्ध कठोर कार्यवाही होयबाक चाही जाहिसँ एहेन परिस्थिति फेरसँ हमर समाजमे नहि देखल जाय।
ओ कहलनि जे एहि पर टिप्पणी नहि करब जे ई हिंसा पूर्वनियोजित छल वा नहि। केवल सरकार, गृह विभाग आ मुख्यमंत्री एकरा स्पष्ट कऽ सकैत छथि। जे कियो एहि हिंसाक लेल जिम्मेदार अछि ओकरा सबक सिखाओल जेबाक चाही।
महाराष्ट्रक मंत्री नितेश राणे एही हिंसाक लेल समाजवादी पार्टीक विधायक अबू आजमीकेँ दोषी ठहराबैत कहलनि जे ई सरकारकेँ बदनाम करबाक लेल ‘पूर्वनियोजित हिंसा’ छल। हिंसा पर नितेश राणे कहलनि, “एकर लेल अबू आजमी जिम्मेदार छथि। ओ एहि समस्याकेँ प्रारंभ कयलनि। ई सरकारकेँ बदनाम करबाक लेल पूर्व नियोजित हिंसा छल। जे हमर पुलिसकर्मी पर हाथ उठाबैत छथि ओकरा हम नहि छोड़ब। एहि मामिलामे सख्त कार्यवाही कएल जाएत। नितेश राणे इहो कहलनि जे हिंसक घटनामे जे कियो पुलिसक खिलाफ हाथ उठौलक ओकरा छोड़ल नहि जायत। राणे कहलनि जे ३३ पुलिसकर्मी घायल भेल छथि आ सवाल उठौलनि जे नागपुरमे कोन तरहक आन्दोलन चलि रहल अछि जतय प्रदर्शनकारी पुलिसक विरुद्ध हिंसक छल।
जनतब जे दंगा भड़कलाक बाद पुलिस ५० सँ बेसी लोककेँ हिरासतमे लेलक आ जांच जारी अछि।
