प्रधानमंत्री नरेन्द्र मोदी बुधदिन पोर्ट लुइसमे कहलनि जे भारत-मॉरीशस साझेदारीकेँ ‘उन्नत रणनीतिक साझेदारी’क दर्जा देबाक लेल एकटा समझौता भेल अछि।
प्रधानमंत्री मोदी मॉरीशसक प्रधानमंत्री डॉ. नवीन चन्द्र रामगुलामक संग एकटा संयुक्त संवाददाता सम्मेलनकेँ संबोधित करैत कहलनि कि प्रधानमंत्री रामगुलाम आ हम भारत-मॉरीशस साझेदारीकेँ उन्नत रणनीतिक साझेदारीक दर्जा देबय केर फैसला कयलौंह। ओ आगू उल्लेख कयलनि जे हमसभ इहो निर्णय लेलहुँ जे भारत मॉरीशसमे एकटा नव संसद भवनक निर्माणमे सहायता करत, जे मॉरीशसकेँ ‘लोकतंत्रक जननी’ द्वारा उपहार होयत।
ओ कहलनि जे एकर अतिरिक्त मॉरीशसमे १०० किलोमीटर पैघ जल पाइपलाइनक आधुनिकीकरणक लेल एकटा परियोजना शुरू कयल जायत। सामुदायिक विकास परियोजनाक दोसर चरणमे ५० करोड़ मॉरीशस टाकाक नव परियोजना शुरू कयल जायत।
ओ कहलनि जे अगिला पाँच वर्षमे मॉरीशसक ५०० लोक सेवककेँ भारतमे प्रशिक्षण भेटत। हम स्थानीय मुद्रामे द्विपक्षीय व्यापार लेनदेनक निपटाराक लेल सेहो सहमत छी।
प्रधानमंत्री कहलनि जे स्वतंत्र, खुला, सुरक्षित आ संरक्षित हिन्द महासागर भारत आ मॉरीशसक साझा प्राथमिकता अछि। हम मॉरीशसक अनन्य आर्थिक क्षेत्रकेँ सुरक्षित करबामे पूर्ण सहयोग देबाक लेल प्रतिबद्ध छी। चाहे ग्लोबल साउथ होय, हिन्द महासागर होय, वा अफ्रीकी महाद्वीप, मॉरीशस हमर महत्वपूर्ण भागीदार अछि।
दस साल पहिने, विजन सागर, जकर अर्थ अछि “क्षेत्रमे सबहक लेल सुरक्षा आ विकास”, एतय मॉरीशसमे स्थापित कयल गेल छल। हम सभ पूरा क्षेत्रक स्थिरता आ समृद्धिक लेल विजन सागरकेँ आगू बढ़ौने छी। वैश्विक दक्षिणक लेल हमर विजन महासागर होयत, जकर अर्थ अछि “क्षेत्रमे सुरक्षा आ विकासक लेल पारस्परिक आ व्यापक उन्नति”। एहिमे विकासक लेल व्यापार, सतत विकासक लेल क्षमता निर्माण, आ साझा भविष्यक लेल आपसी सुरक्षाक भावना सम्मिलित अछि।
प्रधानमंत्री १.४ अरब भारतीयक दिससँ मॉरीशसक सभ नागरिककेँ राष्ट्रीय दिवसक शुभकामना देलनि। ओ कहलनि जे भारत आ मॉरीशस मात्र हिन्द महासागरक माध्यमसँ नहि अपितु साझा सांस्कृतिक परम्परा आ मूल्यक माध्यमसँ सेहो जुड़ल अछि। हम आर्थिक आ सामाजिक दुनू मामिलामे मजबूत भागीदार छी। चाहे ओ प्राकृतिक आपदा होय वा कोविड संकट, हम सभ सदैव एक दोसरक समर्थन कयलहुँ। हम रक्षा, शिक्षा, स्वास्थ्य आ अंतरिक्ष सहित हर क्षेत्रमे कंधासँ कंधा मिला कऽ काज कऽ रहल छी। पछिला १० सालमे हम सभ अपन सम्बन्धमे कतेको नव आयाम जोड़ने छी। विकास सहयोग आ क्षमता निर्माणमे नव मीलक पत्थर स्थापित कयल गेल अछि।
